انتخابی نظام ناقص اور غیر معتبر ہے: قاضی زاہد حسین

عوامی تحریک نے انتخابی اصلاحات کے لئے لانگ مارچ کیا: صدر عوامی تحریک
انتخابی نظام بدعنوانوں کاسہولت کار ہے: میاں ریحان، قاضی شفیق، نوراحمد سہو
عوامی تحریک کی ”اصلاحات پھر انتخابات“ کے موضوع پر سوشل میڈیا مہم

لاہور (17 جنوری 2023ء) پاکستان عوامی تحریک کے مرکزی صدر قاضی زاہد حسین نے کہا ہے کہ کراچی کے دھاندلی زدہ انتخابات نے ایک بار پھر ثابت کر دیا ہمارا انتخابی نظام ناقص اور غیر معتبر ہے۔ موجودہ انتخابی نظام ڈیفالٹرز اور بدعنوانوں کا سہولت کار ہے۔ پاکستان عوامی تحریک واحد سیاسی جماعت ہے جس نے دھاندلی زدہ انتخابی نظام کو بدلنے کے لئے جنوری 2013ء میں لانگ مارچ کیا تھا اور اس ضمن میں عوامی شعور بیدار کیا۔ جب تک آئین کے مطابق انتخابی نظام تشکیل نہیں پاتا اس وقت تک قوم حقیقی جمہوریت کے ثمرات سے محروم رہے گی۔عوامی تحریک کے مرکزی صدر نے سوشل میڈیاٹیم کو ”اصلاحات پھر انتخابات“ کے حوالے سے سوشل میڈیا پر مہم چلانے پر مبارکباد دی اور کہا کہ سوشل میڈیا ٹیم اور ایکٹیوسٹس نے حقیقی معنوں میں ایک قومی مسئلہ شاندار انداز میں عوامی سطح پر اجاگر کیا ہے۔

قاضی زاہد حسین نے کہا کہ اس نظام کے تحت پڑھا لکھا رزق حلال کمانے والا الیکشن نہیں لڑسکتا کیونکہ ایک مخصوص مافیا نے الیکشن کو کروڑوں، اربوں کا کھیل بنادیا ہے۔ آئین کے آرٹیکل 62 اور 63 پر پورا اترنے والوں کو ہی الیکشن لڑنے کی اجازت ہونی چاہیے۔ پاکستان عوامی تحریک پنجاب کے زونل صدور میاں ریحان مقبول، قاضی شفیق، نور احمد سہو اور سیکرٹری کوآرڈینیشن عارف چودھری نے اپنے مشترکہ بیان میں کہا کہ اصلاحات کے بغیر انتخابات کا کوئی نتیجہ نہیں نکلے گا۔ کراچی کے بلدیاتی انتخابات کے نتایج ہمارے سامنے ہیں۔ ڈاکٹر محمد طاہرالقادری نے تاریخی جملہ ادا کیا تھا کہ اس نظام کے تحت 100 الیکشن بھی ہو جائیں تبدیلی نہیں آئے گی۔ انہوں نے کہا کہ پاکستان عوامی تحریک انتخابی اصلاحات کے لئے ہر سطح پر اپنی آواز بلند کرتی رہے گی۔ جب تک انتخابی اصلاحات نہیں ہوں گی اس وقت تک ڈاکو، چور، لٹیرے مسلط رہیں گے۔