رانا شمیم بیان حلفی کی اصل کاپی لینے لندن جائیں گے پھر نہیں آئیں گے: خرم نواز گنڈاپور

رانا شمیم جس استاد کے شاگرد ہیں وہ دوائی لینے گئے اور واپس نہیں آئے، سیکرٹری جنرل پی اے ٹی
شریف خاندان انصاف لینے سے زیادہ انصاف کے اداروں کو بدنام کرنے میں دلچسپی رکھتا ہے
نواز شریف کا پروڈکشن ہاؤس ہالی وڈ اور بالی وڈ سے زیادہ اچھا کام کر رہا ہے

لاہور (10 دسمبر 2021) پاکستان عوامی تحریک کے سیکرٹری جنرل خرم نواز گنڈاپور نے کہا ہے کہ رانا شمیم بیان حلفی کی اصل کاپی لندن لینے جائیں گے پھر کبھی واپس نہیں آئیں گے۔ یہ جس استاد کے شاگرد ہیں وہ دوائی لینے گیا اور آج تک واپس نہیں آیا۔ شریف خاندان کے افراد کی انصاف لینے سے زیادہ انصاف کے اداروں کو بدنام کرنے میں دلچسپی رکھتے ہیں ''الحمدللہ'' اور'' اللہ اکبر'' کہنے والے یہ آڈیو ویڈیو کے یہ ثبوت اپنی بے گناہی ثابت کرنے کیلئے خود عدالتوں میں لے کر کیوں نہیں جاتے؟۔ نواز شریف کا پروڈکشن ہاؤس ہالی وڈ اور بالی وڈ سے زیادہ اچھا کام کر رہا ہے۔ اگلا آسکر ایوارڈ نواز شریف کو ملنا چاہیے۔ لندن میں تعمیر کئے گئے محلات کی منی ٹریل ہوتی تو قطری خط اور کیلبری فونٹ اخباروں کی شہ سرخیاں نہ بنتے۔

انھوں نے مزید کہا کہ ن لیگ کے پروڈکشن ہاؤس میں کئی رانا شمیم جیسے ہیرو، سائیڈ ہیرو اور ولن اپنا اپنا سکرپٹ یاد کر رہے ہیں، اشرافیہ کے پاس رسیدوں کے سوا باقی سب کچھ ہے۔ اشرافیہ کو پاکستان کی فلم انڈسٹری کو پاؤں پر کھڑا کرنے کرنے کیلئے بھی کوئی کردار ادا کرنا چاہیے۔