سوشل میڈیا نوجوانوں کی تعلیم و تربیت کا مؤثر ذریعہ ہے: خرم نواز گنڈاپور

رائے ساجد، آصف جوئیہ، سکندر اعوان کو سوشل میڈیا ورکنگ کونسل میں ذمہ داریاں تفویض
ڈاکٹر طاہرالقادری نے اسلام اور پاکستان کے نظریاتی محافظ تیار کئے: سیکرٹری جنرل پی اے ٹی

لاہور (2 اگست 2021) پاکستان عوامی تحریک کے سیکرٹری جنرل خرم نواز گنڈاپور نے منہاج یوتھ لیگ کی طرف سے رائے ساجد حسین کو سوشل میڈیا ورکنگ کونسل کا ہیڈ، حافظ آصف جوئیہ کو کوآرڈینیٹر اور سکندر اعوان کو ڈپٹی کوآرڈینیٹر منہاج یوتھ لیگ سوشل میڈیا ورکنگ کونسل مقرر کرنے کا نوٹیفکیشن جاری کر دیا ہے۔ یوتھ لیگ کے مرکزی صدر کی سفارش پر ایس ایم ڈبلیو سی نے عہدیداروں کے ناموں کی توثیق کی جس کا باضابطہ نوٹیفکیشن سیکرٹری جنرل پاکستان عوامی تحریک نے جاری کر دیا۔

اس موقع پر گفتگو کرتے ہوئے خرم نواز گنڈاپور نے کہا کہ سوشل میڈیا تحریکوں اور جماعتوں کے منشور اور لائحہ عمل کی تشہیرکے حوالے سے ایک موثر ذریعہ ابلاغ اور نوجوانوں کی تعلیم و تربیت اور کردار سازی کا ذریعہ ہے۔ انہوں نے کہا کہ اسلام اور نظریہ پاکستان کے دشمن نئی نسل کو گمراہ کرنے کے لئے سوشل میڈیا کا منفی استعمال کررہے ہیں۔ ایسے تخریبی عناصر کا راستہ روکنا ضروری ہے۔ شیخ الاسلام ڈاکٹر محمد طاہرالقادری نے اسلام اور پاکستان کے ایسے نظریاتی محافظوں کی ٹیم تیار کر دی ہے جن کے ہوتے ہوئے کوئی نظریاتی شر انگیزی نہیں کر سکتا اور نہ ہی نوجوانوں کو گمراہ کر سکتا ہے۔ نوجوانوں کے کردار اور ایمان کی حفاظت اپنا دینی و قومی فریضہ سمجھتے ہیں۔

دریں اثناء پاکستان عوامی تحریک کے مرکزی سیکرٹری اطلاعات نوراللہ صدیقی اور سوشل میڈیا ورکنگ کونسل کے ہیڈ فرخ شہزاد نے رائے ساجد حسین، حافظ آصف جوئیہ اور سکندر اعوان کو سوشل میڈیا ورکنگ کونسل میں نئی ذمہ داریاں ملنے پر مبارکباد دی ہے۔ پاکستان عوامی تحریک کے سوشل میڈیا ہیڈ آصف گجر، ویمن لیگ سوشل میڈیا ہیڈ انشراح باجی اور مصطفوی سٹوڈنٹس موومنٹ کے سوشل میڈیا ہیڈ فراز ہاشمی اور منصور قاسم اعوان، شہزاد اکبر، شوکت ابرار نے بھی منہاج یوتھ لیگ کے عہدیداروں کو نئی ذمہ داریاں ملنے پر مبارکباد دی ہے۔