ایک ایک کر کے قومی لٹیروں کو فرار کروایا جا رہا ہے: خرم نواز گنڈاپور

ریاست لٹیروں قاتلوں کا احتساب نہیں کر سکتی تو انھیں کرپشن کے لائسنس جاری کر دے
ماڈل ٹاؤن کے قاتل نواز شریف بھی علاج کے بہانے لندن فرار ہونا چاہتے ہیں: سیکرٹری جنرل

لاہور (27 اپریل 2019) پاکستان عوامی تحریک کے سیکرٹری جنرل خرم نواز گنڈاپور نے اپنے بیان میں کہا ہے کہ اگر ماڈل ٹاؤن کے قاتلوں اور قومی لٹیروں کو ایک ایک کر کے فرار کروانا ہے تو پھر ریاست فیس لیکر کرپشن اور جرم کرنے والوں کی سہولت کےلیے لائسنس جاری کرنے کے پیکج کا اعلان کر دے، انصاف کے نام پر جو ظلم ہورہا ہے کسی مہذب ملک میں اس کی مثال نہیں ملتی، یہ نظام صرف لٹیروں اور پیسے والے کریمنلز کا محافظ ہے۔

اس سے جان چھڑا لی جائے قانون میں دم خم اور سول سوساءٹی نام کی کوئی چیز ہوتی تو سانحہ ماڈل ٹاؤن کے شہداء کے ورثا کو انصاف بھی ملتا اور اقامہ اینڈ کمپنی علاج کے نام پر ڈرامے کرتی نظر نہ آتی۔

انہوں نے کہا کہ جس معاشرے میں قانون مجرموں کا سہولت کار بن جائے اور مظلوم انصاف کے لئے دھکے کھا رہے ہوں وہاں امن آسکتا ہے نہ خوشحالی، پوری دنیا اقتصادی، جغرافیائی، سیاسی سماجی تبدیلیوں کے عمل سے گزر رہی اور پارلیمنٹ میں دھینگا مشتی ہو رہی ہے۔ انہوں نے کہا کہ سابق حکمرانوں نے ایک بھی ہسپتال بنایا ہوتا تو آج انھیں باہر سے علاج کی ضرورت نہ پڑتی ۔