نواز شریف کی کرپشن اور ماڈل ٹاؤن کیس میں طلبی کے فیصلے بلاتاخیر ہونے چاہئیں: ڈاکٹر طاہرالقادری

وزیراعظم اور الیکشن کمیشن گورنر ہاؤسز کے سیاسی و انتخابی استعمال پر خاموش کیوں ہیں؟ سربراہ عوامی تحریک
نگران وفاقی حکومت نادرا کی ڈیٹا چوری رپورٹس پر ابہام دور کرنے کے لیے پالیسی بیان جاری کرے
کاغذات نامزدگی داخل اور منظور کرنے کے مراحل میں آئین کے آرٹیکل 63/62 نظرانداز ہوئے
ووٹ کو عزت دو کا نعرہ لگانے والوں نے مخصوص نشستوں پر اہلخانہ کی جھولیاں بھریں، ورکرز لارڈز کیخلاف عزت دومہم چلائیں
لندن فلیٹس کے اصل مالک نواز شریف ہیں، کرپشن کیسز کو پری پول رگنگ سے جوڑنا سازشی بیانیہ ہے

لاہور (20 جون 2018) پاکستان عوامی تحریک کے سربراہ ڈاکٹر محمد طاہرالقادری نے پارٹی کے سینئر رہنماؤں کے مشاورتی اجلاس میں گفتگو کرتے ہوئے کہا کہ نواز شریف کی کرپشن اور ماڈل ٹاؤن کیس میں طلبی کے فیصلے بلاتاخیر ہونے چاہئیں، کرپشن کیسز کو پری پول رگنگ سے جوڑنا بدنام زمانہ سازشی بیانیہ ہے، بنگلہ دیشی وزیراعظم بھی کرپشن پر جیل میں ہیں، نواز شریف کے جیل جانے سے کوئی قیامت نہیں ٹوٹے گی، الیکشن کمیشن اور نگران وزیراعظم گورنر ہاؤسز کے سیاسی و انتخابی استعمال پر خاموش کیوں ہیں؟ کیا آئینی و ریاستی سربراہان کا ایک جماعت کی انتخابی مہم میں شریک ہونے سے فیئر اینڈ فری الیکشن کا ماحول متاثر نہیں ہو رہا؟

ٹیکس چوروں، قتل عام کے نامزد ملزمان اور کرپشن کیسز میں ٹرائل ہونے والوں کو الیکشن لڑنے کی اجازت مل گئی، کاغذات نامزدگی داخل اور منظور کرنے کے مراحل میں آئین کے آرٹیکل 63/62 کو نظرانداز ہوئے، ووٹرز کے ڈیٹا چوری کی رپورٹس پر ابہام دور کرنے کیلئے نگران وفاقی حکومت بلا تاخیر پالیسی جاری کرے، ووٹ کو عزت دو کا نعرہ لگانے والوں نے مخصوص نشستوں پر اہلخانہ کی جھولیاں بھریں، سٹریٹ ورکرز چاہیں تو پولیٹیکل لارڈز کے خلاف عزت دومہم چلا سکتے ہیں، عوام لوڈشیڈنگ ختم کرنے کے جھوٹے دعوے کرنے والوں کا ووٹ سے محاسبہ کریں، کرپٹ اشرافیہ نے 5 سال میں مہنگائی، قرضے، لوڈشیڈنگ، روپے کی بے قدری اور کرپشن کے تحفے دئیے، عام آدمی کیلئے تعلیم، صحت کی سہولیات کی فراہمی کا معیار گرا، پارٹی امیدواروں کے 23 جون کے اجلاس میں آئندہ کا لائحہ عمل دینگے۔

مشاورتی اجلاس میں سیکرٹری جنرل خرم نواز گنڈاپور، مرکزی سیکرٹری اطلاعات نوراللہ صدیقی و دیگر رہنماؤں نے شرکت کی۔

ڈاکٹر طاہرالقادری نے کہا کہ ملک و قوم کا پیسہ لوٹنے پر نواز شریف خاندان جیل میں جائے گا، تاہم شریف برادران اور ان کے حواریوں کو سانحہ ماڈل ٹاؤن کیس میں ٹرائل کیے جانے کے منتظر ہیں، ہمارے بے گناہ کارکنوں کے قاتل نواز شریف اور شہباز شریف ہیں، ان کی طلبی کیلئے لاہور ہائیکورٹ میں فل بنچ سماعت کررہا ہے اور ہم فیصلے کا انتظار کررہے ہیں، ڈاکٹر طاہرالقادری نے کہا کہ نواز شریف لندن فلیٹس کے اصل مالک ہیں اور یہ جائیدادیں آف شور کمپنیوں اور بچوں کے نام پر خریدی گئیں، نواز شریف کی منی لانڈرنگ اور لوٹ مار کھلی کتاب کی طرح ہے، انہیں سزاؤں اور جیل جانے سے کوئی نہیں روک سکتا، نواز شریف نے پارلیمنٹ میں لندن فلیٹس کی ملکیت کا اعتراف کیا، منی ٹریل دینا بھی انہی کی ذمہ داری ہے، قطری کے خط کی صورت میں جو مضحکہ خیز منی ٹریل دی گئی وہ مسترد ہو چکی، اب وہ جیل جائینگے۔