ختم نبوت کے قانون کو بدلنے کے پیچھے نااہل نواز شریف ہے: ڈاکٹر طاہرالقادری

جن وزراء کے ذریعے ایمان کی اساس پر حملہ کروایا گیا، انکا تحفظ کیا جا رہا ہے
پوری قوم کا مطالبہ ہے کہ ذمہ دار وزراء کو بر طرف کیا جائے، کور کمیٹی سے خطاب
سوال یہ نہیں حکومت نے ترامیم واپس لے لیں سوال یہ ہے یہ جرات کس نے کس کے کہنے پر کی؟
نااہلی ختم کروانے کیلئے بیرونی قوتوں کی مدد سے عقیدہ ختم نبوت پر حملہ کیا گیا: سربراہ عوامی تحریک

لاہور (25 نومبر 2017) پاکستان عوامی تحریک کے سربراہ ڈاکٹر محمد طاہرالقادری نے عوامی تحریک کی سنٹرل کور کمیٹی کے ہنگامی اجلاس سے خطاب کرتے ہوئے کہا ہے کہ ختم نبوت کے قانون کو بدلنے کے پیچھے کوئی اور نہیں نا اہل نواز شریف ہے، نا اہلیت ختم کروانے کیلئے بیرونی قوتوں کی مدد سے یہ ترامیم کی گئیں جن وزراء کے ذریعے ایمان کی اساس پر حملہ کروایا گیا انہیں بر طرف کرنے کی بجائے تحفظ دیا جا رہا ہے، نا اہل کو ڈر ہے ذمہ دار وزراء کو فارغ کیا تو وہ ماسٹر مائنڈ کا نام بتا دیں گے۔

انہوں نے ویڈیو لنک پر خطاب کرتے ہوئے کہا کہ پوری قوم کا مطالبہ ہے کہ ختم نبوت کے قانون سے چھیڑ چھاڑ کرنے والوں کو بر طرف کیا جائے اور انہیں قانون کے مطابق سزا دی جائے، فی الوقت سوال یہ نہیں کہ حکومت نے ترامیم واپس لے لیں اور اصل قانون بحال کر دیا سوال یہ ہے کہ یہ جرات کس نے کی، کس کے کہنے پر کی اور کیوں کی؟ ذمہ داروں کو اس لئے بچایا جا رہا ہے کہ اس سازش کا کھرا اشرافیہ کے گھروں کی طرف جاتا ہے۔ سربراہ عوامی تحریک نے کہا کہ ماڈل ٹاؤن میں خون بہانے والے حکمرانوں نے ختم نبوت کے عقیدے پر حملہ کر کے کروڑوں اسلامیان پاکستان کے مذہبی جذبات کا خون بہایا۔ وہ پاکستان عوامی تحریک کی کور کمیٹی کے ہنگامی اجلاس سے خطاب کر رہے تھے۔

ڈاکٹر طاہرالقادری نے کہا کہ حکومت ایک دو وزراء کو بر طرف کرنے کی بجائے پورے ملک کو بد امنی کی آگ میں جھونک رہی ہے۔ اول روز سے یہ مطالبہ ہے کہ ذمہ داروں کو سزا دی جائے یہ اسلامیان پاکستان کا اجتماعی مطالبہ ہے۔ دریں اثناء اجلاس میں گفتگو کرتے ہوئے خرم نواز گنڈا پور نے کہا کہ پولیس ان قاتل حکمرانوں کے کہنے پر گولی نہ چلا ئے ورنہ جس طرح پنجاب پولیس کے 124 افسران اور اہلکار سانحہ ماڈل ٹاؤن کیس میں انسداد د ہشتگردی کی عدالت کی خاک چھان رہے ہیں، حکمرانوں کے غیر قانونی احکامات ماننے والوں کا انجام اس سے مختلف نہیں ہو گا۔