سویڈن کی آرچ بشپ ریورنڈ آنتجے جیکولن کی منہاج القرآن کے رہنما سہیل احمد رضا سے ملاقات

اسلام دین امن و محبت، باہمی مشاورت اور اخوت کا علمبردار ہے: سہیل رضا
مسیحی رہنما کو ڈاکٹر طاہرالقادری کی دہشتگردی کے خلاف تاریخی تصنیف فتویٰ کی کاپی دی گئی

لاہور (18 اکتوبر2017) سویڈن کی خاتون مسیحی رہنما آرچ بشپ ریورنڈ آنتیجے جیکولن نے اپنے دورہ پاکستان کے موقع پر ڈائریکٹر انٹرفیتھ ریلیشنز سہیل احمد رضا سے مرکزی سیکرٹریٹ ماڈل ٹاؤن میں ملاقات کی۔ دونوں رہنماؤں میں مسلم مسیحی تعلقات کے باہمی فروغ، مذہبی رواداری، معاشرتی ہم آہنگی اور عالمی امن کے حوالے سے تفصیلی تبادلہ خیال ہوا۔ دونوں رہنماؤں میں پاکستان میں بسنے والی مذہبی اقلیتوں کو درپیش مسائل کے حوالے سے بھی تفصیلی گفتگو ہوئی۔

سہیل احمد رضا نے مسیحی رہنما کو بتایاکہ آئین پاکستان تمام مذاہب کے پیروکاروں کے بنیادی سماجی، معاشی، سیاسی اور آئینی حقوق کے تحفظ کی ضمانت دیتا ہے۔ بعض اوقات مغربی میڈیا اس حوالے سے منفی پراپیگنڈہ بھی کرتا رہتا ہے جس کی ہم بھر پور مذمت کرتے ہیں کیونکہ حقیقت ان معاملات سے مختلف ہوتی ہے۔ ہم بحیثیت مسلمان اپنے غیر مسلم پاکستانی شہریوں کے بنیادی حقوق کے حصول کیلئے ہمہ وقت جدوجہد کرتے رہتے ہیں جو کہ ہماراقومی آئینی اور مذہبی فریضہ ہے۔ اسلام دین امن و محبت، باہمی مشاورت اور اخوت کا علمبردار ہے، اسلام نے انسانیت کو اخلاقی، معاشی، معاشرتی اور سیاسی حقوق عطا کیے۔

ہم تمام پاکستانی جن میں مسلم اکثریت اور بلا تفریق تمام مذاہب کے پیروکار متحد ہو کر دہشتگردی، انتہا پسندی کے خلاف جدوجہد کر رہے ہیں۔ آرچ بشپ سویڈن نے پاکستان میں اقلیتی برادری کے حوالہ سے اطمینان کا اظہار کرتے ہوئے دہشتگردی کے خاتمے کیلئے سربراہ عوامی تحریک ڈاکٹر محمد طاہرالقادری کی خدمات کو زبر دست خراج تحسین پیش کیا انہوں نے کہا کہ منہاج القرآن انٹرنیشنل پاکستان اور دنیا کے دیگر ممالک میں بلا تفریق رنگ و نسل و مذہب انسانیت کی خدمت کیلئے کوشاں ہے، ملاقات میں منہاج القرآن ویمن لیگ کی نمائندہ خواتین بھی موجود تھیں۔