رانا ثناء اللہ جھوٹا، مکار اور سانحہ ماڈل ٹاؤن کا مرکزی کردار ہے : راہنما عوامی تحریک

عدالت کے فیصلے کو سبوتاژ کرنے کے لیے فرقہ واریت پھیلنے کا پروپیگنڈا بطور ڈھال کیا جا رہا ہے
عدالت کے فیصلے کا خیر مقدم کر تے ہیں:خرم نواز گنڈا پور، بشارت جسپال، فیاض وڑائچ ودیگر

لاہور (21 ستمبر 2017) پاکستان عوامی تحریک کے سیکرٹری جنرل خرم نواز گنڈاپور نے کہا ہے کہ رانا ثناء اللہ ایک جھوٹا اور مکار شخص ہے، سانحہ ماڈل ٹاؤن کا منصوبہ اسی شخص نے بنایا اور اس پر عمل کیا، یہ بے گناہوں کے مرکزی قاتلوں میں سے ہے، ان شاء اللہ تعالی یہ قاتل ٹولہ اللہ اور قانون کی گرفت میں آنے والا ہے، قاتل ٹولہ جسٹس باقر نجفی کمیشن کی رپورٹ پبلک ہونے کی صورت میں بطور ڈھال فرقہ واریت پھیلنے کا پروپیگنڈا کر رہا ہے۔ حالانکہ پنجاب میں لاء اینڈ آرڈر کی بربادی کا ذمہ دار یہی وزیر قانون پنجاب ہے۔ ان کے اپنے لوگ اسے بیس بیس افراد کو قتل کرنے کا ذمہ دار ٹھہراچکے ہیں، رانا ثناء اللہ کی دھمکیوں سے لگ رہا ہے کہ پنجاب کا قاتل ٹولہ عدلیہ کے فیصلے کو سبوتاژ کرنے کے لیے فرقہ واریت پھیلائے گا۔ عدلیہ اس گھٹیا بیان اور گھٹیا ذہنیت کا بھی نوٹس لے۔ 14 بے گناہوں کے قاتلوں کو کٹہرے میں لانے سے فرقہ واریت کیسے پھیلے گی؟

پاکستان عوامی تحریک کے سینئر راہنماؤں بشارت جسپال، فیاض وڑائچ، نور اللہ صدیقی، ساجد محمود بھٹی، جی ایم ملک، جواد حامد نے جسٹس باقر نجفی کمیشن رپورٹ پبلک کئے جانے کے فیصلے کا خیر مقدم کرتے ہوئے کہا ہے کہ پنجاب کے حکمران اگر مگر کی بجائے رپورٹ پبلک کریں تاکہ ورثاء کو انصاف ملنے کا عمل آگے بڑھ سکے۔ انہوں نے کہا کہ ہمیں ڈر ہے جس طرح نواز شریف، اسحاق ڈار، حمزہ شہباز، مریم نواز، حسن، حسین قومی خزانے کی لوٹ مار کا حساب دینے کی بجائے باہر بھاگ گئے ہیں اسی طرح نواز شریف اور رانا ثناء اللہ بھی باہر نہ بھاگ جائیں، انہیں ECL میں ڈالا جائے اور جب تک کیس کا فیصلہ نہ ہو یہ تمام قاتل کردار عہدوں سے الگ ہو جائیں۔

خرم نواز گنڈاپور نے کہا کہ آج ہم شہدائے ماڈل ٹاؤن کے ورثاء اور وکلاء کے ہمراہ ہوم سیکرٹری سے عدالتی حکم کی روشنی میں رپورٹ کی کاپی لینے جائیں گے اور رپورٹ پڑھنے کے بعد آئندہ کی قانونی حکمت عملی طے کی جائے گی۔

دریں اثناء پاکستان عوامی تحریک ویمن لیگ کی مرکزی صدر فرح ناز، افنان بابر، عائشہ مبشر، زینب ارشدنے عدالتی فیصلے کا خیر مقدم کیا، انہوں نے کہا کہ رپورٹ میں موجود حقائق جاننا شہدائے ماڈل ٹاؤن کے ورثاء کا حق ہے، انہوں نے کہا کہ اس سے پہلے کہ شہباز شریف بھی بھاگ جائے ان کے نام ECL میں ڈالے جائیں۔