فیصلہ پاکستان کے حق میں آیا، عدلیہ اور قوم کو مبارکباد : ڈاکٹر طاہرالقادری

ججز اور جے آئی ٹی ممبرز نے قوم پر احسان کیا، پنجاب کے قاتل ٹولے کو بھی پکڑا جائے
نواز شریف نے جو بویا باقی زندگی کاٹیں گے، تکبر اور غرور کے بت خاک میں مل گئے
کرپشن کو تحفظ دینے والے نظام کو بدلنے کیلئے اب گو نظام گو تحریک چلے گی : سربراہ عوامی تحریک

لاہور (28 جولائی 2017) پاکستان عوامی تحریک کے سربراہ ڈاکٹر محمد طاہرالقادری نے سپریم کورٹ کے لارجر بنچ کی طرف سے نواز شریف کو نا اہل قرار دینے کے فیصلہ کو تاریخی قرار دیا اور عدلیہ اور قوم کو مبارکباد دی۔ انہوں نے کہا کہ متفقہ فیصلہ آنے پر زیادہ خوشی ہے، جے آئی ٹی کے تمام ممبرز اور لارجر بنچ کے تمام معزز ممبرز نے ہم آواز ہو کر کہا کہ وزیر اعظم صادق اور امین نہیں ہیں۔ انہوں نے کہا کہ اللہ نے ایک خائن سے قوم کی جان چھڑائی ججز اور جے آئی ٹی ممبرز نے قوم پر احسان کیا، اشرافیہ کی کرپشن کو بے نقاب کرنیوالے صحافی، اینکر اور سیاسی جماعتوں کے کارکنان اور وکلاء بھی مبارکباد کے مستحق ہیں۔ یہ فیصلہ پاکستان کی ایک بڑی کامیابی ہے۔ ڈاکٹر طاہرالقادری نے کہا کہ ان شا اللہ اب سانحہ ماڈل ٹاؤن کے شہدا کے ورثا کو بھی انصاف ملے گا اور پنجاب کے قاتل ٹولے کو بھی پکڑا جائے گا۔ ڈاکٹر طاہرالقادری نے سنٹرل کور کمیٹی کے ممبران سے ٹیلی فون پر گفتگو کرتے ہوئے کہا کہ ان درندوں نے جس طرح پانامہ لیکس کیس کے حوالے سے ریکارڈ بدلا، حقائق مسخ کرنے کی کوشش کی اسی طرح سانحہ ماڈل ٹاؤن کے حقائق بھی تبدیل کرنے کی کوشش کی، جسٹس باقر نجفی کمیشن کی رپورٹ کو دبا یا۔ ہمارا سب سے پہلا مطالبہ جسٹس باقر نجفی کمیشن کی رپورٹ کو پبلک کرنا ہے۔ انہوں نے کہا کہ نواز شریف کی نا اہلی کرپشن کے خاتمے کی مہم کا نقطہ آغاز ہونی چاہیے جس جس نے ملک لوٹا ہے اور جو جو سہولت کار بنا ہے سب کا کڑا احتساب ہونا چاہیے۔ قوم صرف نواز شریف کی نا اہلی کے جشن منانے تک محدود نہ رہے بلکہ لوٹ مار کے اس نظام کو بدلنے کا مصمم ارادہ کرے، اب ’’گو نظام گو‘‘ تحریک چلے گی اورلوٹی گئی قومی دولت کی پائی پائی واپس خزانے میں لائی جائے گی۔ انہوں نے کہا کہ ان ظالموں نے کر سی بچانے کیلئے بے گناہ انسانی خون پانی کی طرح بہایا اور آج اقتدار بچا نہ خاندانی وقار، تکبر اور غرور کے بت خاک میں مل گئے۔