نواز شریف کو اقتدار میں عالمی مہرے لائے، ’’تفتیش‘‘ اور چیخیں مصنوعی ہیں: ڈاکٹر طاہرالقادری

باقر نجفی رپورٹ ماڈل ٹاؤن کیس کا حصہ بننے سے شریف برادران کی گردن کا سریا نکلے گا
سانحہ ماڈل ٹاؤن کیس کے آخری اشتہاری ایس پی سلیمان کو بھی ضمانت کی ’’ضمانت‘‘ مل گئی: گنڈاپور

لاہور (4 جولائی 2017) پاکستان عوامی تحریک کے سربراہ ڈاکٹر طاہرالقادری نے لندن میں مصروف دن گزارا۔ انہوں نے اوورسیز تنظیموں کے رہنماؤں سے ملاقات کے دوران کہا کہ نواز شریف کو عالمی مہرے ایک مخصوص ایجنڈے کے ساتھ اقتدار میں لائے، وہ بال بھی بیکا نہیں ہونے دینگے، عالمی سازش ہونے کے بیانات مذاق ہیں، پاناما کیس کی تفتیش اور چیخیں مصنوعی اور سکرپٹ کے مطابق ہیں۔ انہوں نے کہا کہ نواز شریف اقتدار میں آئے نہیں لائے گئے ہیں، اس میں ہمسایوں اور 7 سمندر پار کے دوستوں کی ہیوی انویسٹمنٹ شامل ہے، قوم تصویر کے اس رخ کو ذہنوں سے اوجھل نہ ہونے دے۔

انہوں نے کہا کہ جسٹس باقر نجفی کمیشن کی رپورٹ پبلک ہونے اور استغاثہ کیس کا حصہ بننے سے شریف برادران کی بولتی بند اوران کی گردنوں کے سریے نکلیں گے، ریاست نے 14 شہریوں کو قتل کیا اور نظام عدل قاتلوں کو تحفظ دے رہا ہے، ابھی ظلم کی سیاہ رات اپنے عروج پر ہے، تبدیلی کے عمل کی نشاندہی کرنے والی علامات فی الحال نظر نہیں آرہیں، ہماری نظر شہدائے ماڈل ٹاؤن کے انصاف پر ہے، اسی انصاف سے 21 کروڑ عوام پر انصاف کے بند دروازے کھلیں گے۔

دریں اثناء پاکستان عوامی تحریک کے سیکرٹری جنرل خرم نواز گنڈاپور نے کہا ہے کہ آج بھی ہمارے وکلاء شہدائے ماڈل ٹاؤن کے انصاف کیلئے انسداد دہشتگردی کی عدالت میں پیش ہوئے، ہماری اطلاع کے مطابق پنجاب حکومت، پولیس اور پراسیکیوشن نے سانحہ ماڈل ٹاؤن کے ایک اور اشتہاری کو ضمانت کی ’’ضمانت‘‘ دے دی ہے، ایس پی سلیمان پولیس کی ایف آئی آر اور پولیس کی جے آئی ٹی کی روشنی میں سانحہ ماڈل ٹاؤن کے کیس میں اشتہاری قرار پائے، اب 3 سال کے بعد اس اشتہاری کو ضمانت بھی ملے گی اور پرکشش تقرری بھی۔ شہریوں کے قتل عام کے بعد انصاف کا قتل عام جاری ہے۔ انہوں نے کہا کہ ہمارا انصاف کے آئینی محافظوں سے سوال ہے کہ کیا قتل کیس کے ہر اشتہاری کو یہی پروٹوکول ملتا ہے جو سانحہ ماڈل ٹاؤن کیس کے اشتہاری ایس پی سلیمان کو مل رہا ہے؟ انہوں نے کہا کہ سانحہ ماڈل ٹاؤن کے نامزد قاتل آج بھی حکومت میں ہیں اور اپنے اثر و رسوخ کے باعث شہدائے ماڈل ٹاؤن کے ورثاء کو انصاف ملنے نہیں دے رہے؟ سانحہ ماڈل ٹاؤن استغاثہ کیس کی انسداد دہشتگردی کی عدالت میں مزید سماعت 3 اگست کو ہوگی، ججز کو چھٹیاں ہونے کے باعث لمبی تاریخ پڑی۔