قصاص تحریک میں شرکت پر تحریک انصاف، دیگر جماعتوں کے شکرگزار ہیں، خرم نواز گنڈاپور

3 ستمبر کی احتجاجی ریلی کا دعوت نامہ نہیں ملا، جہانگیر ترین سے 28 اگست کو اسلام آباد میں ملاقات ہوگی
تحریک انصاف کے پاکستان مارچ میں شرکت کا حتمی فیصلہ سربراہ عوامی تحریک کریں گے، سیکرٹری جنرل

لاہور (27 اگست 2016) پاکستان عوامی تحریک کے سیکرٹری جنرل خرم نواز گنڈاپور نے کہا ہے کہ شہر شہر جاری ہماری قصاص تحریک کے احتجاجی دھرنوں میں تحریک انصاف سمیت ق لیگ، جماعت اسلامی، مجلس وحدت المسلمین، سنی اتحاد کونسل، پیپلز پارٹی، جمیعت علمائے پاکستان کے راہنما و کارکنان شریک ہو رہے ہیں جس پر ہم ان کے شکر گزار ہیں۔ سانحہ ماڈل ٹاؤن کے ظلم اور قصاص کے لیے تمام جماعتیں اول روز سے شہدائے ماڈل ٹاؤن کے ساتھ ہیں۔ تحریک انصاف سمیت اپوزیشن کی تمام جماعتوں نے 31 جولائی کے قومی مشاورتی اجلاس کے موقع پر بھی سانحہ ماڈل ٹاؤن کے انصاف کے لیے اپنے بھرپور تعاون کا اعادہ کرتے ہوئے متفقہ اعلامیہ پر دستخط بھی کئے تھے۔ انہوں نے کہا کہ 3 ستمبر کے پاکستان مارچ میں شرکت کے حوالے سے تحریک انصاف کی طرف سے باضابطہ دعوت نامہ موصول ہونے کے بعد غور و خوض ہوگا اور شرکت کے حوالے سے حتمی فیصلہ عوامی تحریک کے سربراہ ڈاکٹر طاہرالقادری کریں گے۔ انہوں نے بتایا کہ تحریک انصاف کے سیکرٹری جنرل جہانگیر ترین سے 28 اگست کو اسلام آباد میں ملاقات ہوگی جس میں احتجاجی تحریک کے حوالے سے تفصیلی گفتگو ہوگی۔

دریں اثناء پاکستان عوامی تحریک کی طرف سے 28 اگست کے احتجاج کے انتظامات کے لیے شمالی پنجاب کے صدر بریگیڈئیر (ر) محمد مشتاق للا کی سربراہی میں 10 رکنی کمیٹی تشکیل دی گئی ہے۔ کمیٹی راولپنڈی میں قصاص و سالمیت پاکستان کے حوالے سے ہونے والے احتجاج کے جملہ انتظامات کی دیکھ بھال کرے گی۔ پاکستان عوامی تحریک کے سربراہ ڈاکٹر طاہرالقادری ویڈیو لنک کے ذریعے لاہور سے خطاب اور دوسرے مرحلے کے احتجاجی پروگرام کے حوالے سے اہم گفتگو کریں گے۔ ڈاکٹر طاہرالقادری نے 10 رکنی کمیٹی کو ہدایت کی ہے کہ وہ احتجاجی دھرنے میں شرکت کے لیے وکلاء، اپوزیشن جماعتوں، سول سوسائٹی ودیگر سماجی تنظیموں کے رہنماؤں اور کارکنان کو شرکت کی دعوت دے۔