آج ملتان میں دھرنا ہو گا، ڈاکٹر طاہرالقادری خطاب کرینگے۔ رہنما عوامی تحریک

28 کو راولپنڈی، کراچی اور کوئٹہ میں نا انصافی کے خلاف کارکن نکلیں گے۔ خرم نواز گنڈاپور
سانحہ ماڈل ٹاؤن کے مرکزی کرداروں کو فرار کروایا جا رہا ہے۔ فیاض وڑائچ

لاہور (26 اگست 2016) پاکستان عوامی تحریک کے سیکرٹری جنرل خرم نواز گنڈاپور، جنوبی پنجاب کے صدر فیاض وڑائچ، جنرل سیکرٹری سردار سیف اللہ سدوزئی نے کہا ہے کہ آج ملتان میں قصاص دھرنا ہو گا۔ دھرنے سے رات 9 بجے عوامی تحریک کے سربراہ ڈاکٹر طاہرالقادری اور شیخ رشید خطاب کریں گے۔ 28 اگست کو راولپنڈی، کراچی اور کوئٹہ میں نا انصافی کے خلاف کارکن، سول سوسائٹی اور اپوزیشن جماعتوں کے کارکن شریک ہونگے۔ خرم نواز گنڈا پور نے کہاکہ عوامی تحریک کا احتجاج سانحہ ماڈل ٹاؤن کے قصاص کیلئے ہے۔ حکمران کی نیندیں اڑی ہوئی ہیں اسی لئے سانحہ ماڈل ٹاؤن کے مرکزی کرداروں کو فرار کروایا جا رہا ہے مگر قاتل بچ نہیں سکیں گے۔ جنوبی پنجاب کے صوبائی صدر فیاض وڑائچ نے کہاکہ احتجاج کے تمام انتظامات مکمل کر لئے ہیں۔ کارکنوں کا ٹھاٹھیں مارتا سمندر آج کے احتجاج میں شریک ہو گا۔ انہوں نے کہاکہ احتجاجی ریلی گھنٹہ گھر چوک سے شروع ہو کر نواں شہر ملتان اختتام پذیر ہو گی۔ انہوں نے کہاکہ ڈاکٹر طاہرالقادری 28 اگست کو قصاص و سالمیت پاکستان تحریک کے دوسرے راؤنڈ کا اعلان کرینگے۔