عوامی تحریک کی طرف سے وزیراعظم کے خلاف ملک گیر ’’استعفیٰ دوتحریک‘‘ چلانے کا اعلان
احتجاجی مظاہروں کیلئے ضلعی تنظیموں کو خطوط ارسال، تحریک وزیراعظم
کے استعفے تک جاری رہے گی
شریف برادران کی کرپشن کے ثبوت جمع کرنے کیلئے سینئر وکلاء پر مشتمل خصوصی سیل قائم
کر دیا گیا
سانحہ ماڈل ٹاؤن کے ذمہ داروں کو کیفر کردار تک پہنچا کر دم لیں گے، سیکرٹری جنرل خرم
نواز گنڈاپور
لاہور (14 اپریل 2016) پاکستان عوامی تحریک نے پانامہ لیکس کے حوالے سے وزیراعظم کے استعفے تک ملک گیر احتجاجی مظاہروں کا اعلان کر دیا ہے۔ احتجاجی تحریک کا نام ’’استعفیٰ دو تحریک‘‘ رکھا گیا ہے۔ اس سلسلے میں سیکرٹری جنرل خرم نواز گنڈاپور نے تمام ضلعی تنظیموں کو مراسلہ جاری کردیا ہے۔ گزشتہ روز ان کی زیر صدارت منعقدہ اجلاس میں فیصلہ کیا گیا کہ پانامہ لیکس میں حکمران خاندان کی کرپشن کے واضح ثبوت منظر عام پر آچکے ہیں۔ ان ثبوتوں سے نہ صرف دنیا بھر میں پاکستان کی بدنامی ہوئی بلکہ وزیراعظم میاں نواز شریف حکومت کرنے کے بھی اہل نہیں رہے۔ اجلاس میں میجر(ر) محمد سعید، مرکزی سیکرٹری اطلاعات نوراللہ صدیقی، سیکرٹری کوآرڈینیشن ساجد بھٹی، فرح ناز، نعیم الدین چودھری ایڈووکیٹ، مظہر علوی، میر آصف اکبر، شہزاد رسول، رانا تجمل و دیگر رہنماؤں نے شرکت کی۔
سیکرٹری جنرل عوامی تحریک نے ضلعی تنظیموں کے نام لکھے گئے خط میں احتجاجی پروگرام دیتے ہوئے کہا ہے کہ تمام تنظیمات حکمران خاندان کی کرپشن سے متعلق رابطہ عوام مہم چلائیں، مقامی اور سوشل میڈیا کا بھرپور استعمال کیا جائے۔ تمام اضلاع میں وزیراعظم استعفیٰ دو کے بینر لگانے کی ہدایت بھی کی گئی اور ضلعی پریس کلب کے باہر مظاہرے کرنے کا فیصلہ بھی کیا گیا۔
سیکرٹری جنرل خرم نوازگنڈاپورنے اجلاس سے خطاب کرتے ہوئے کہا کہ لوٹی گئی ملکی دولت کسی ایک جماعت کی نہیں پاکستان کی ہے۔ پانامہ لیکس میں حکمران خاندان کی کرپشن کے ناقابل تردید ثبوت موجود ہیں۔ اب کسی کمیشن نہیں ایکشن کی ضرورت ہے۔ انہوں نے کہا کہ لوٹی گئی دولت واپس لانے تک احتجاج جاری رہے گا۔ کرپشن اور ظالم نظام کے خاتمہ کیلئے ڈاکٹر طاہرالقادری کے کارکنوں نے جانی و مالی قربانیاں دیں، 70دن کے دھرنے میں نامساعد حالات کا سامنا کیا۔ اب یہ تحریک اپنے منطقی انجام تک پہنچے گی اور سانحہ ماڈل ٹاؤن کے ذمہ داروں کو کٹہرے میں کھڑا کرینگے۔
تبصرہ