پیرس: جعلی جے آئی ٹی کا قاتلوں کو کلین چٹ! پاکستان میں قانونی اداروں کی کریڈبیلٹی پر سوالیہ نشان ہے۔ حاجی محمد اسلم

پیرس (اے کے راؤ) پاکستان عوامی تحریک فرانس و یورپ کے صدر حاجی محمد اسلم چوہدری نے سانحہ ماڈل ٹاؤن پر حکومتی جے آئی ٹی کی مبینہ رپورٹ پر اپنے شدید ردعمل کا اظہار کرتے ہوئے کہا ہے کہ دھن، دھونس اور دھاندلی سے قائم جعلی جمہوریت کی جے آئی ٹی نے کنفرم قاتلوں کو کلین چٹ دے کر پاکستان میں قانونی اداروں کی کریڈبیلٹی پر ایک بڑا سوالیہ نشان رقم کردیا ہے۔ انہوں نے کہا ہے کہ تمام ٹی وی چینلز کی رپورٹس گواہ ہیں کہ منہاج القرآن سیکرٹریٹ پر پولیس کی چڑھائی یکطرفہ تھی۔ ان کا کہنا تھا کہ ہماری مرکزی قیادت پہلے ہی کلیر کرچکی تھی کہ قاتلوں کو کلین چٹ دینے کیلئے قائم کی گئی جے آئی ٹی منظور نہیں۔ حاجی محمد اسلم نے زور دے کر کہا کہ ہمارا قاتل پنجاب کا وزیراعلیٰ ہے اور معاون قاتل رانا ثناءاللہ اور دیگر افسران ہیں لیکن قاتل اعلیٰ کان کھول کر سن لیں 14 بے گناہوں کا خون رائیگاں نہیں جانے دیا جائے گا۔ غیر قانونی جے آئی ٹی کو تسلیم کیا نہ اسکی نام نہاد رپورٹ کو مانتے ہیں۔

پاکستان عوامی تحریک فرانس کے جنرل سیکرٹری نعیم چوہدری نے مبینہ رپورٹ پر اپنے شدید رد عمل میں کہا کہ جے آئی ٹی کے سربراہ نے قاتل اعلیٰ کے فائرنگ سکوارڈ کے باپ کا کردار ادا کرتے ہوئے 14 بے گناہوں کے خون پر مٹی ڈالنے کی ناپاک حرکت کی ہے جس کی سزا اسے اس دنیا میں بھی ملے گی اور آخرت میں بھی اسکا منہ کالا ہوگا۔