پنجاب حکومت کی بیڈگورننس کے خلاف عوام سراپا احتجاج ہیں: عوامی تحریک

ڈاکٹرز، نابیناؤں کے بعد استاد، کسان بھی سڑکوں پر آ گئے، بشارت جسپال کا اجلاس سے خطاب
گونگی بہرہ حکومت عوامی مسائل سے لا تعلق، سڑکیں پلیں بنانے میں مصروف ہے: مشتاق نوناری ایڈووکیٹ

لاہور (9 مئی 2015) پاکستان عوامی تحریک کا اہم تنظیمی اجلاس مرکزی سیکرٹریٹ میں منعقد ہوا، اجلاس سے خطاب کرتے ہوئے سنٹرل پنجاب کے صدر بشارت جسپال نے کہا کہ پنجاب حکومت کی بیڈگورننس کے باعث عوام سراپا احتجاج ہیں، ان کے بنیادی آئینی و قانونی حقوق پامال کیے جارہے ہیں۔ ڈاکٹرز، نابیناؤں کے بعد اساتذہ اور کسان بھی سڑکوں پر آ گئے، گونگی، بہری حکومت عوامی مسائل اور تکلیفوں سے لا تعلق سڑکوں اور پلوں کی تعمیر میں مصروف ہے جس کے پیچھے کرپشن اورکمیشن ہے۔ اجلاس سے جنرل سیکرٹری پنجاب مشتاق نوناری ایڈووکیٹ، راجہ زاہد نے بھی خطاب کیا۔ بشارت جسپال نے کہا کہ اساتذہ دو یوم پنجاب کے سب سے بڑے جمہوری ایوان کے سامنے سڑک پر پڑے رہے مگر سنگدل اور علم دشمن حکمرانوں کو اتنی بھی توفیق نہ ہوئی کہ وہ ان کے مسائل سن کر انہیں تسلی ہی دے دیں۔ انہوں نے کہا کہ اساتذہ کی تذلیل کرنے والے درحقیقت آئندہ نسلوں کا مستقبل تاریک کررہے ہیں۔ استاد کا احترام نہ کرنے والے شرح خواندگی میں اضافہ کے مسلسل جھوٹے دعوے کررہے ہیں۔ انہوں نے کہا کہ پنجاب کے موجودہ حکمران صرف ٹھیکیدار دوست پالیسیاں اور منصوبے دے رہے ہیں۔ مشتاق نوناری ایڈووکیٹ نے خطاب کرتے ہوئے کہا کہ عوامی تحریک اساتذہ اور کسانوں کے مطالبات کی حمایت کرتی ہے اور مطالبہ کرتی ہے کہ اساتذہ اور کسانوں کے مسائل حل کیے جائیں اور حکمران ملکی ترقی میں اہم کردار ادا کرنے والے ان طبقات کے خلاف جنگ بند کر دیں۔