مسئلہ کشمیر کشمیری عوام کی امنگوں اور اقوام متحدہ کی قراردادوں کے مطابق حل ہونا چاہیے۔ سید ہدایت رسول قادری

فیصل آباد: تحریک منہاج القرآن کے ضلعی امیر سید ہدایت رسول قادری، ناظم میاں کاشف محمود نے 5 فروری یومِ یکجہتی کشمیر کے موقع پر کشمیری عوام سے اظہار یکجہتی کر تے ہوئے اپنے ایک بیان میں کہا کہ کشمیر کا مسئلہ کشمیری عوام کی امنگوں اور اقوامِ متحدہ کی قراردادوں کے مطابق حل ہونا چاہیے۔ اس حوالے سے عالمی سطح پر پائی جانے والی سرد مہری دنیا کے لئے سوالیہ نشان ہے۔ کشمیر کا مسئلہ ڈائیلاگ کے ذریعے حل ہونا چاہیے اور اس کی قراردادوں پر عمل درآمد وقت کی اہم ترین ضرورت ہے۔ کشمیریوں کا حقِ خود ارادیت عالمی طور پر مسلمہ ہے، بھارت ہٹ دھرمی ترک کر کے مکالمے کا دروازہ کھولے اور پاکستان کے ساتھ مذاکرات کی ٹیبل پر مسئلہ کو حل کیا جائے۔ انہوں نے کہا کہ طاقت کے ذریعے مسئلہ پہلے حل ہوا نہ آئندہ ہوگا، پاکستان اور بھارت کھلے دل مسئلے کو حل کرنے کی نیت سے مذاکرات کریں تو کوئی وجہ نہیں کہ اس مسئلے کا حل نہ نکل سکے۔ دونوں ملک اچھے ہمسایوں کی طرح رہنے کا عزم کر لیں تو مسئلہ کشمیرتھوڑے عرصے میں حل ہو سکتا ہے۔ انہوں نے کہا کہ خطے کے امن کے لیے مسئلہ کشمیر کا حل ہونا بہت ضروری ہے۔ اس سے دونوں ملکوں کے عوام خوشحال ہونگے اور کشمیریوں کو بھی ان کا حق مل جائے گا۔