سانحہ ماڈل ٹاؤن کے انصاف کے لیے حکومت کی عدم دلچسپی پر دکھ ہے: خرم نواز گنڈاپور

ڈاکٹر طاہر القادری 15 جون کو اہم پریس کانفرنس سے خطاب کریں گے
دوست ناراض ہوں یا خوش کارکنوں کے انصاف کیلئے ہر حد تک جائیں گے
آج کل سانحہ ماڈل ٹاؤن کے ملزم پنجاب حکومت کی حفاظت میں ہیں
17 جون شہدا کی 7ویں برسی پر ملک گیر احتجاج ہوگا

لاہور (12 جون 2021) پاکستان عوامی تحریک کے سیکرٹری جنرل خرم نواز گنڈاپور نے کہا کہ آج کل سانحہ ماڈل ٹاؤن کے نامزد ملزمان پنجاب حکومت کی حفاظت میں ہیں، دوست ناراض ہوں یا خوش سانحہ ماڈل ٹاؤن کے انصاف کے لیے ہر حد تک جائیں گے، قائد تحریک منہاج القرآن شیخ الاسلام ڈاکٹر محمد طاہرالقادری 15 جون کو منہاج القرآن انٹرنیشنل کے مرکزی سیکرٹریٹ ماڈل ٹاؤن لاہور میں دوپہر 2 بجے اہم پریس کانفرنس سے خطاب کریں گے۔

17 جون کو ناانصافی کے خلاف اضلاع میں احتجاجی ریلیاں نکالی جائیں گی، انہوں نے مرکزی راہنماؤں سے گفتگو کرتے ہوئے کہا کہ سانحہ ماڈل ٹاؤن کے انصاف کے حوالے سے پنجاب حکومت کی عدم دلچسپی پر دکھ ہے، سانحہ میں ملوث پولیس افسروں کو پنجاب حکومت تحفظ دے رہی ہے۔ عوامی تحریک کے کارکنوں کے خلاف پنجاب کے تھانوں میں درج جھوٹے مقدمات ختم نہیں کیے جا رہے، ہمارے شہید کارکن ہر وقت ہماری آنکھوں کے سامنے رہتے ہیں، انصاف ہماری واحد ڈیمانڈ ہے انہوں نے کہا 17 جون کو آئندہ کا لائحہ عمل طے کیا جائے گا۔