نا اہل وزیر اعظم اپنے بنائے نیب کے سامنے پیش ہونے سے خوفزدہ کیوں : ڈاکٹر طاہرالقادری

انہیں صفائی دینے کا تیسرا موقع ملا، جی ٹی روڈ والے سوالات نیب میں اٹھائیں، گفتگو
21 اگست کو ’’الہدایہ کیمپ‘‘ میں شرکت کیلئے مانچسٹر جائینگے، عید پاکستان میں منائیں گے: ترجمان

لاہور (18 اگست 2017) پاکستان عوامی تحریک کے سربراہ ڈاکٹر محمد طاہرالقادری نے کہا ہے کہ نااہل وزیراعظم اپنے بنائے نیب اور تعینات کردہ افسروں کے سامنے پیش ہونے سے خوفزدہ کیوں ہیں؟انہیں صفائی دینے کا تیسرا موقع ملا ہے اس سے فائدہ اٹھائیں اور جی ٹی روڈ والے سوالات نیب کے سامنے اٹھائیں۔ انہوں نے پاکستان عوامی تحریک کے مختلف ونگز اور فورمز کے صدور سے ملاقات کے دوران گفتگو کرتے ہوئے کہاکہ تین بار وزیراعظم بننے والے شخص کو قانون اور اداروں کا احترام کرتے ہوئے نیب میں پیش ہونا چاہیے۔ نیب کی طرف سے یہ طلبی پاکستان کی سب سے بڑی عدالت کے حکم پر ہو رہی ہے۔ انہوں نے کہا کہ کسی کے طرز عمل سے اندازہ ہوتا ہے کہ اس کے نزدیک آئین، جمہوریت اور اداروں کا کتنا احترام ہے۔ سربراہ پاکستان عوامی تحریک نے کہاکہ کرپشن کا اژدھا قانون کے شکنجے میں آیا ہے امید ہے اس بار لوٹ مار کی پائی پائی کا حساب ہو گا۔ انہوں نے کہا کہ والیم 10 نیب کے حوالے ہونے کی خبریں سن رہے ہیں، ہم اس انتظار میں ہیں کہ جسٹس باقر نجفی کمشن کی رپورٹ انسداد دہشتگردی کی عدالت میں زیر سماعت شہدائے ماڈل ٹاؤن کے ورثاء کی طرف سے دائر کردہ استغاثہ کا جلد سے جلد حصہ بنے تا کہ انصاف کا عمل درست سمت میں آگے بڑھ سکے۔

دریں اثناء پاکستان عوامی تحریک کے ترجمان کے مطابق ڈاکٹر محمد طاہرالقادری 21 اگست کو برطانیہ دورہ پر روانہ ہوں گے جہاں وہ پہلے سے طے شدہ کانفرنسز میں شریک ہوں گے جو لندن، مانچسٹر میں منعقد ہو رہی ہیں۔ ترجمان کے مطابق سربراہ عوامی تحریک عیدالاضحیٰ سے قبل پاکستان آ جائینگے۔ ترجمان نے کہا کہ پاکستان عوامی تحریک کے سربراہ ڈاکٹر طاہرالقادری مانچسٹرمیں چار روزہ ’’الہدایہ کیمپ‘‘ میں شرکت کریں گے، اس کیمپ میں یورپ بھر سے تحریک منہاج القرآن کے عہدیداران اور زندگی کے مختلف شعبہ جات سے تعلق رکھنے والی ممتاز شخصیات شریک ہوں گی۔