پیدائشی سرمایہ دار کا کنٹینر میں بیٹھ کر انقلاب کی بات کرنا مضحکہ خیز ہے: ڈاکٹر طاہرالقادری

پہلے یہ سابق کا لفظ دیکھ کر غصے میں آجاتے تھے، نااہل لگنے پر آپے سے باہر ہو گئے۔ سربراہ عوامی تحریک
یہی اس نظام کے بلڈر، انجینئر، پروموٹر سپورٹر ہیں۔ اسی نظام کو بچانے کیلئے ماڈل ٹاؤن میں خون بہایا
16 اگست کو شہدائے ماڈل ٹاؤن اور شہدائے انقلاب کے ورثاء پرامن طریقے سے مال روڈ پر آئینگے
سپریم کورٹ کے فیصلے کو تسلیم نہ کرنا اور عوام کو اکسانا ریاست کے خلاف کھلی بغاوت ہے۔ اجلاس سے خطاب
لگتا ہے نااہل شخص کے ہاتھ میں تقریروں کی غلط فائل آگئی، ایسی باتیں تو اپوزیشن میں بھی نہیں ہوتیں

لاہور (12 اگست 2017) پاکستان عوامی تحریک کے سربراہ ڈاکٹر محمد طاہرالقادری نے عوامی تحریک کی مشاورتی کونسل کے اجلاس سے خطاب کرتے ہوئے کہا کہ پیدائشی سرمایہ دار کا کنٹینر میں بیٹھ کر انقلاب کی بات کرنا مضحکہ خیز ہے۔ یہ اس نظام کے بلڈر، انجینئر، پروموٹر اور سپورٹر ہیں۔ اس نظام کو انہوں نے 35 سال پالا پوسا، ثمرات سمیٹے اور اسی نظام کو بچانے کیلئے ماڈل ٹاؤن لاہور اور اسلام آباد ڈی چوک میں لاشیں گرائیں۔ لگتا ہے ان کے ہاتھ میں تقریروں کی کوئی غلط فائل آ گئی ہے ۔ جس تنقید کی اپوزیشن میں رہتے ہوئے بھی کوئی گنجائش نہیں ہوتی یہ وہ ہرزہ سرائی آئینی اداروں کے خلاف حکومت میں رہتے ہوئے کررہے ہیں۔ ان کی پارٹی والے ان کا علاج کراوئیں۔ پہلے یہ اپنے نام کے ساتھ سابق دیکھ کر غصے میں آجاتے تھے۔ نااہل لگنے پر آپے سے باہر ہو گئے۔ سپریم کورٹ کے فیصلے کو تسلیم نہ کرنا اور عوام کو اکسانا ریاست کے خلاف کھلی بغاوت ہے۔ اجلاس میں خرم نواز گنڈاپور۔ فیاض وڑائچ۔ جی ایم ملک۔ مرکزی سیکرٹری اطلاعات نوراللہ صدیقی و دیگر رہنما شریک تھے۔

ڈاکٹر طاہرالقادری نے کہا کہ یہ سڑکوں پر پوچھتے پھر رہے ہیں ہمارا قصور کیا ہے۔ شہدائے ماڈل ٹاؤن کے ورثاء، یتیم بچے پوچھ رہے ہیں ان کے والدین اور عزیز و اقارب کا کیا قصور تھا کہ انہیں خون میں نہلایا گیا اور پھر انصاف کا قتل عام کیاگیا۔ اپنے لیے انصاف مانگنے والوں نے 14 شہیدوں کی ایف آئی آر بھی درج نہیں ہونے دی تھی۔ ڈاکٹر طاہرالقادری نے کہا کہ ان کا انقلاب یہی ہے کہ غریب بچوں کو کچل دیں۔ انہیں ہسپتال پہنچانے کی بجائے ان کے اوپر سے مزید گاڑیاں گزاریں اور پھر شہید کہہ کر انسانیت کا مذاق اڑائیں۔ انسانیت کے دشمن اس قاتل ’’انقلابی ‘‘نے بچے کے جنازے میں شرکت تک نہیں کی۔

انہوں نے کہا کہ آدھے نواز شریف کو سپریم کورٹ نے بے نقاب کیا اور پورے نواز شریف نے چند روز کے اندر جی ٹی روڈ پر اپنے آپ کو بے نقاب کر لیا اور اس کے اندر چھپا ہوا ایک سفاک ڈکٹیٹر پوری طرح کھل کر سامنے آگیا۔ انہوں نے مزید کہا کہ نواز شریف نے اپنا نام جمہوریت، اقتدار، حکومت، اپوزیشن، آئین، پاکستان، نظام، ترقی رکھا ہوا ہے وہ سمجھتے ہیں اگر میں نہیں تو پھر کچھ بھی نہیں۔ ڈاکٹر طاہرالقادری نے کہا کہ 16 اگست کو مال روڈ پر شہدائے ماڈل ٹاؤن، شہدائے انقلاب کے ورثاء زخمی اور اسیران شریک ہونگے۔ ہم پرامن لوگ ہیں اور پرامن طریقے سے شہداء کے خاندان والے انصاف کیلئے اپیل کرینگے اور جسٹس باقر نجفی کمیشن کی رپورٹ پبلک کرنے کی استدعا کرینگے۔