پائیدار امن کیلئے بین المذاہب مکالمہ ناگزیر ہے: امریکن قونصلیٹ راب نیوسم

عوامی تحریک و منہاج القرآن کے زیر اہتمام کرسمس کی تقریب، کیک کاٹا گیا، ملکی خوشحالی کیلئے دعائیں
تقریب سے خرم نواز گنڈا پور، فادر جیمز چنن، پنڈت بھگت لال، سردار بشن سنگھ، ڈاکٹر ہرمن، ساجد بھٹی و دیگر کا خطاب

لاہور (27 دسمبر 2016) پاکستان عوامی تحریک اور تحریک منہاج القرآن کے زیراہتمام مرکزی سیکرٹریٹ میں کرسمس کے حوالے سے خصوصی تقریب منعقد ہوئی۔ تقریب کے اختتام پر کیک بھی کاٹا گیا، مہمان خصوصی امریکن قونصلیٹ لاہور کے اکنامک اینڈ پولیٹیکل افیئرز کے ہیڈ مسٹر راب نیوسم نے خطاب کرتے ہوئے کہا کہ مذہبی آزادی کیلئے بین المذاہب مکالمہ ناگزیر ہے۔ امریکہ پاکستان میں امن کیلئے کوشاں تمام مذاہب کے پیروکاروں کے ساتھ کھڑا ہے اور ہم ایک پر امن، محفوظ، مضبوط اور خوشحال پاکستان کی تعمیر چاہتے ہیں۔

انہوں نے کہا کہ دنیا میں پائیدار امن کے قیام کیلئے بین المذاہب ہم آہنگی کے پیغام کو عام کرنے کی ضرورت ہے۔ مسلم ہوں یا مسیحی، ہندو ہوں یا سکھ امن اور محبت کا فروغ ہر مذہب کی بنیادی تعلیمات کا حصہ ہے۔ دہشتگردی اور انتہا پسندی کے خاتمے کیلئے تمام مذاہب کے پیروکاروں کے درمیان پرجوش تعلقات ناگزیر ہیں۔ انہوں نے منہاج القرآن سیکرٹریٹ میں کرسمس کی پروقار تقریب کے انعقاد اور تمام مذاہب کے رہنماؤں کے مدعو کرنے پر ڈاکٹر محمد طاہرالقادری کو مبارکباد دی اور کہا کہ ہم سمجھتے ہیں کہ ڈاکٹر طاہرالقادری اسلا م کے پر امن تشخص کے فروغ کیلئے پوری دنیا میں اپنا بہترین کردار ادا کر رہے ہیں۔

عوامی تحریک کے سیکرٹری جنرل و ناظم اعلیٰ تحریک منہاج القرآن خرم نواز گنڈا پور نے امریکن قونصلیٹ مسٹر راب نیو سم کو مرکز آمد پر خوش آمدید کہا اور کہا کہ تحریک منہاج القرآن ٹوٹے ہوئے دلوں کو جوڑنے کی تحریک ہے، علم، امن اور تحقیق ہمارا مشن ہے اور یہ مشن ہم نے اپنے پیغمبر اسلام حضرت محمد صلی اللہ علیہ وآلہ وسلم کی تعلیمات سے لیا ہے۔ ڈاکٹر طاہرالقادری نے اپنی علمی، تحقیقی کاوشوں سے پوری دنیا پر یہ واضح کیا ہے کہ اسلام کا انتہا پسندی سے کوئی تعلق نہیں ہے۔ اسلام امن، محبت اور رواداری کا دین ہے۔

انہوں نے کرسمس کے حوالے سے مسیحی بھائیوں کو مبارکباد دی۔ سٹیج سیکرٹری کے فرائض عوامی تحریک کے سیکرٹری کوآرڈینیشن ساجد محمود بھٹی نے انجام دئیے انہوں نے تمام مہمانوں کو منہاج القرآن سیکرٹریٹ میں آمد پر خوش آمدید کہا۔ دعا ناظم امور خارجہ جی ایم ملک نے کرائی۔ کرسمس کی تقریب سے فادر جیمز چنن، ریورنڈ شاہد معراج، سردار بشن سنگھ، ڈاکٹر پروفیسر ہرمن، ڈاکٹر منوہر چاند، پنڈت بھگت لال، ڈاکٹر مرقس فدا، علامہ افضل سعیدی، تنویر خان، امیر لاہور حافظ غلام فرید نے خطاب کیا۔ تقریب میں جنوبی پنجاب کے صدر فیاض وڑائچ مرکزی سیکرٹری اطلاعات نور اللہ صدیقی، جواد حامداور ویمن لیگ، یوتھ لیگ اور ایم ایس ایم کے نوجوانوں نے کثیر تعداد میں شرکت کی۔

تقریب کا آغاز تلاوت قرآن پاک سے ہوا اسکے بعد بائبل کی آیات پڑھیں گئیں۔ کرسمس کی تقریب میں معروف نعت خواں ظہیر بلالی نے نعت پیش کی۔ تقریب کے اختتام پر تمام مہمانوں نے کرسمس کا کیک کاٹا۔ فادر جیمز چنن نے کہا کہ اسلام دشمنوں کے انسانی حقوق کا بھی احترام کرنے والا مذہب ہے۔ پنڈت بھگت لال نے کہا کہ ڈاکٹر طاہرالقادری نے سب کو جوڑ کے رکھا ہوا ہے، ہم ادارہ منہاج القرآن کی ترقی کیلئے دعا گو ہیں۔

ریورنڈ شاہد معراج نے کہا کہ اللہ کے تمام پیغمبروں نے انسانیت سے پیار کا درس دیا، ڈاکٹر منوہر چاند نے خطاب کرتے ہوئے کہا کہ حضرت محمد صلی اللہ علیہ وآلہ وسلم پوری دنیا کیلئے رحمت تھے۔ ان پر جتنا حق مسلمانوں کا ہے اتنا ہمارا بھی ہے، سردار بشن سنگھ نے کہا کہ تمام مذاہب کے مقدس ایام کے مواقع پر ڈاکٹر طاہرالقادری اور انکے سکالرز اظہار یکجہتی کیلئے پیش پیش ہوتے ہیں۔ یہ ہم سب کیلےء اطمینان اور فخر کی بات ہے۔