حکومت ڈلیور کرنے اور اپوزیشن متحد ہونے میں ناکام رہی: خرم نواز گنڈاپور

قوم اور سیاسی جماعتیں مفادات کے خانوں میں بٹ چکیں، نقصان ملک کا ہو رہا ہے
2016ء میں بھی سانحہ ماڈل ٹاؤن کے شہداء کے ورثاء کو انصاف نہ مل سکا، سیکرٹری جنرل PAT

لاہور (18 نومبر 2016) پاکستان عوامی تحریک کے سیکرٹری جنرل خرم نواز گنڈاپور نے کہا ہے کہ حکومت ڈلیور کرنے اور اپوزیشن متحد ہونے میں ناکام رہی۔ قوم اور سیاسی جماعتیں مفادات کے خانوں میں بٹ چکیں، نقصان ملک کا ہورہا ہے۔ غربت اور دہشت گردی کے خاتمے کی آرزو 2016ء میں بھی پوری نہ ہو سکی۔ آئین و قانون کی بالادستی کا خواب 68 سال گزر جانے کے بعد ادھورا ہے۔ طاقتور اس حد تک خود سر ہو چکے ہیں کہ عدالتی فیصلوں کے سامنے سر جھکانے کے بجائے کھلی دھمکیاں دیتے ہیں۔ وفاقی وزیر داخلہ نے جس قسم کا لب و لہجہ اختیار کیا کسی مہذب جمہوری ملک میں اس کا تصور بھی نہیں کیا جا سکتا۔ وزیر داخلہ کو کوئی مسئلہ تھا تو وہ اپنی شخصی طاقت کا مظاہرہ کرنے کے بجائے کسی مجاز فورم سے رجوع کرتے جس ملک کا وزیر داخلہ اور وزیر قانون آئین و قانون کو توڑنے والے ہوں وہاں حقیقی جمہوریت کیسے قائم ہو سکتی ہے۔ وہ مرکزی سیکرٹریٹ میں پاکستان عوامی تحریک کے رہنماؤں سے ملاقات کے دوران گفتگو کر رہے تھے۔

انہوں نے کہا کہ امید تھی کہ 2016ء میں شہدائے ماڈل ٹاؤن کو انصاف ملے گا اور قاتل انجام کو پہنچیں گے مگر استغاثہ دائر کرنے کے باوجود انصاف کی طرف کوئی پیش رفت نہیں ہو سکی۔ حکمران کسی غیر جانبدار انکوائری کو نہیں مانتے اور نہ ہی کوئی ایسا ادارہ ہے جو ان کی گرفت کر سکے۔ سانحہ کوئٹہ کمیشن کی طرح حکمرانوں نے سانحہ ماڈل ٹاؤن جوڈیشل کمیشن کی رپورٹ کو بھی ماننے سے انکار کیا حالانکہ دونوں کمیشن خود حکمرانوں نے بنائے یہ کون سا جمہوری، آئینی، قانونی کلچر ہے کہ جو رپورٹ پسند نہ آئے اسے اٹھا کر ردی کی ٹوکری میں پھینک دیا جائے۔ پاکستان میں دو قانون اور دو نظام ہیں۔ ایک قانون طاقتوروں کو تحفظ دیتا ہے اور ایک قانون کمزوروں کی گرفت کرتا ہے۔

انہوں نے کہا کہ پاکستان عوامی تحریک کے سربراہ ڈاکٹر طاہرالقادری نے آئین و قانون و جمہوریت کی بالادستی کیلئے اپنے کارکنوں سے مل کر بے مثال جانی و مالی قربانیاں دیں۔ اب بھی ظالم نظام کو بدلنے کیلئے ہم اپنا کردار ادا کررہے ہیں تاہم جب تک پاکستان کے عوام ملک کو بچانے کیلئے باہر نہیں نکلیں گے ظلم کی اس سیاہ رات کا اختتام نہیں ہو گا۔