’’ڈاکٹر طاہر القادری کی انقلابی جدوجہد پاکستان کو علامہ اقبال کی فکر پر گامزن کرنے کیلئے ہے‘‘

عوامی تحریک کے رہنماؤں نے مزار اقبال پر سربراہ عوامی تحریک کی طرف سے پھولوں کی چادر چڑھائی
خرم نواز گنڈاپور، جی ایم ملک، ساجد بھٹی، سہیل رض، مظہر علوی، و دیگر کی مزار اقبال پر فاتحہ خوانی

لاہور (9 نومبر 2016) پاکستان عوامی تحریک اور تحریک منہاج القرآن کے رہنماؤں نے 9 نومبر 2016ء کو مزار اقبال پر حاضری دی۔ سیکرٹری جنرل و ناظم اعلیٰ خرم نواز گنڈاپور کی قیادت میں وفد نے پاکستان عوامی تحریک کے سربراہ ڈاکٹر طاہر القادری کی طرف سے مزار اقبال پر پھولوں پر چادر چڑھائی اور فاتحہ خوانی کی۔ اس موقع پر خرم نواز گنڈاپور نے کہا کہ حکیم الامت کی تعلیمات اور فکر ایک خوددار اور غیور قوم کیلئے تھی۔ حکیم الامت چاہتے تھے کہ پاکستان ایک باوقار قوم کے طور پر دنیا میں اپنا کردار ادا کرے۔ علامہ محمد اقبال ایک اعلیٰ تعلیم یافتہ، بلند پایہ مفکر اور عاشق رسول تھے۔ انہوں نے عمر بھر نوجوانوں کو علم، جرآت مندی اور تقویٰ کی فکر دی۔

اس موقع پر جی ایم ملک، ساجد بھٹی، انٹرفیتھ ریلیشنز کے ڈائریکٹر سہیل رضا، جواد حامد، نوراللہ صدیقی، سید امجد علی شاہ، مظہر علوی اور ثناء اللہ خان بھی موجود تھے۔ خرم نواز گنڈاپور نے کہا کہ میاں نواز شریف مسلم لیگ کا نام لیتے ہیں اور علامہ اقبال کو اپنا ہیرو کہتے ہیں جبکہ ان کا سیاسی طور طریقہ غاصبوں، نازیوں والا ہے۔ علامہ اقبال نے معاشی آزادی کیلئے فکر دی تھی جبکہ نواز شریف کی حکومت نے پاکستان کے بچے بچے کو ایک لاکھ 20 ہزار روپے کا مقروض کر دیا ہے۔ پاکستان بننے سے پہلے غریب مسلمان ہندو بنیے کے مقروض تھے اور آزادی حاصل کرنے کے بعد جدید بنیے نے آئی ایم ایف اور ورلڈ بینک کا غلام بنا دیا ہے۔ انہوں نے کہا کہ ڈاکٹر طاہرالقادری پاکستان کو علامہ اقبال اور قائداعظم کا پاکستان بنانے کیلئے انقلاب کا نعرہ بلند کررہے ہیں۔ انشاء اللہ ہم پاکستان کو اغیار کی غلامی سے نجات دلائیں گے ۔ اندھیروں میں ڈوبے ہوئے اقبال کے پاکستان کو روشنی کے سفر پر گامزن کرینگے۔