جنوبی پنجاب کے سیکرٹری انفارمیشن راؤ عارف رضوی اور مرکزی سیکرٹری کوآڑینیشن ساجد بھٹی کے گھر پولیس چھاپے کی مذمت کرتے ہیں

لاہور (30 اکتوبر 2016) پاکستان عوامی تحریک کے مرکزی سیکرٹری اطلاعات نوراللہ صدیقی نے جنوبی پنجاب کے سیکرٹری انفارمیشن راؤ عارف رضوی کے گھر پر ملتان پولیس اور مرکزی سیکرٹری کوآرڈینیشن ساجد بھٹی کے گھر لاہور کینٹ میں چھاپے، اہل خانہ سے بدتمیزی اور بلاوارنٹ گھر کی تلاشی کی شدید الفاظ میں مذمت کرتے ہوئے کہا ہے کہ پنجاب حکومت سیاسی مخالفین سے جینے کا حق چھین رہی ہے اور سیاسی کارکنوں سے زیادتی کررہی ہے۔ پولیس عوامی تحریک کے رہنماؤں کے گھروں پر بلاجواز چھاپے ماررہی ہے۔ آئی جی پنجاب اس کا نوٹس لیں۔ عوامی تحریک کے کسی رہنما نے اور کارکن نے قانون ہاتھ میں نہیں لیا۔ انہیں ہراساں کرنے کا سلسلہ بند کیا جائے۔ انہوں نے کہا کہ ن لیگ اتنی زیادتی کرے جتنی کل کو برداشت کر سکے۔ پنجاب کسی کی ذاتی جاگیر نہیں ہے۔ حکومت شہریوں سے ان سے زندہ رہنے کا حق چھین رہی ہے۔ انہوں نے کہا کہ اس وقت تک عوامی تحریک کے 20 سے زائد رہنماؤں کو گرفتار کیا جا چکا ہے۔ ہم نے چیف جسٹس لاہور ہائیکورٹ سے بھی استدعا کی ہے کہ وہ پولیس کو ظلم سے روکیں اور سیاسی کارکنان سے زیادتیاں بند کر دیں۔