عوامی تحریک کا سیلاب سے قیمتی جانوں کے ضیاع پر اظہار افسوس

متاثرہ خاندانوں کی فوری بحالی کے لئے عملی اقدامات کئے جائیں: خرم نواز گنڈاپور
منہاج ویلفیئر فائونڈیشن نے متاثرین کو ریسکیو اور ریلیف کی فراہمی عمل شروع کر دیا
ہر سال کی تباہی سے بچنے کےلئے مستقل حفاظتی اقدامات ناگزیر ہیں
ہیلی کاپٹر حادثے میں جوانوں کی شہاد ت دلی صدمہ ہوا: سیکرٹری جنرل پی اے ٹی

لاہور (16 اگست 2025) پاکستان عوامی تحریک کے سیکرٹری جنرل خرم نواز گنڈاپور نے حالیہ بارشوں کے نتیجے میں آنے والے سیلاب سے ہونے والے جانی و مالی نقصان پر گہرے دکھ اور افسوس کا اظہار کرتے ہوئے کہا ہے کہ خیبر پختونخواہ، آزاد کشمیر، گلگت سمیت ملک کے دیگر علاقوں میں آنے والے سیلاب سے قیمتی انسانی جانوں کے ضیاع اور ہزاروں خاندانوں کے بے گھر ہونے پر پوری قوم غمزدہ ہے۔

انہوں نے وفاقی و صوبائی حکومتوں سے مطالبہ کیا کہ متاثرہ خاندانوں کی فوری بحالی کے لئے عملی اقدامات کئے جائیں۔ سیلاب سے متاثرہ کسانوں اور مزدور طبقے کے لئے خصوصی مالی امدادی پیکج دیا جائے تا کہ وہ دوبارہ اپنے پائوں پر کھڑے ہو سکیں۔ انہوں نے کہا کہ متاثرہ علاقوں کی بحالی اور حفاظتی اقدامات کو مستقل بنیادوں پر ترجیح دی جائے تا کہ ہر سال عوام کو ایسی مشکلات کا سامنا نہ کرنا پڑے۔

خرم نواز گنڈاپور نے متاثرہ علاقوں میں ریسکیو آپریشن کے دوران گرنے والے ہیلی کاپٹر حادثے میں شہید ہونے والے جوانوں کی شہادت پر اظہار افسوس کرتے ہوئے کہا ہے کہ دکھی انسانیت کی خدمت اور متاثرہ خاندانوں کی مدد کے مشن پر مامور جوانوں کی شہاد ت پر دلی صدمہ ہوا۔ خرم نواز گنڈاپور نے کہاکہ منہاج ویلفیئر فائونڈیشن نے شیخ الاسلام ڈاکٹر محمد طاہر القادری کی خصوصی ہدایات پر متاثرہ علاقوں میں فوری طور پر امدادی سرگرمیوں کا آغاز کر دیا ہے۔ منہاج ویلفیئر فائونڈیشن کی ٹیمیں متاثرہ علاقوں میں پہنچ گئی ہیں۔ امدادی سرگرمیوں کے تحت متاثرین کو ریسکیو اور ریلیف کی فراہمی عمل شروع کر دیا گیا ہے۔ متاثرہ خاندانوں میں خشک راشن، پینے کا صاف پانی اور خیمے تقسیم کئے جا رہے ہیں۔

منہاج ویلفیئر فائونڈیشن نے عارضی طور پر ریلیف کیمپس بھی قائم کر دئے ہیں جہاں بے گھر ہونے والے افراد کو پناہ،کھانا اور ابتدائی طبی امداد فراہم کی جا رہی ہے۔ انہوں نے کہاکہ امدادی سرگرمیوں کا سلسلہ اس وقت تک جاری رہے گا جب تک متا ثرین اپنے گھروں کو واپس جا کر معمولات زندگی بحال نہیں کر لیتے۔