سوشل میڈیا پر ڈاکٹر طاہرالقادری کے 23 دسمبر 2012 کے مینار پاکستان جلسہ کی دھوم

ٹوئٹر پر ’’بدلے گا نظام تو بدلے گا پاکستان‘‘ ٹرینڈ چھایا رہا، سیاسی، سماجی کارکنان کی طرف سے ہزاروں ٹوئٹس
سیاست انسانی خدمت اور عبادت کا دوسرا نام ہے :قائد تحریک منہاج القرآن ڈاکٹر طاہرالقادری کا ٹوئٹ
ڈاکٹر حسن محی الدین، ڈاکٹر حسین محی الدین، خرم نواز گنڈاپور نے بھی 23 دسمبر کے جلسہ کے تناظر میں ٹوئٹس کئے
عوامی تحریک، منہاج یوتھ لیگ، ویمن لیگ، ایم ایس ایم اور ہزاروں منہاج سائبر ایکٹیوسٹس نے ٹوئٹر ایکٹویٹی میں حصہ لیا

لاہور (23 دسمبر 2020) پاکستان عوامی تحریک کے اندرون بیرون ملک مقیم ہزاروں کارکنوں سیاسی، سماجی رہنماؤں نے 23 دسمبر 2012 کے دن نظام کی تبدیلی اور انتخابی اصلاحات کیلئے ڈاکٹر طاہرالقادری کے مینار پاکستان پر ہونے والے جلسہ عام کی یادوں کو سوشل میڈیا پر موضوع بحث بنائے رکھا۔ جلسہ کی تصاویر اور ویڈیوز بڑی تعداد میں شیئر کی گئیں۔ ٹوئٹر پر ’’بدلے گا نظام تو بدلے گا پاکستان‘‘ ٹاپ ٹرینڈ رہا۔ اس ٹرینڈ پر مختلف جماعتوں کے سوشل میڈیا ایکٹیوسٹ نے بھی بھر پور حصہ لیا۔

23 دسمبر 2012 کے جلسہ عام کے تناظر میں قائد تحریک منہاج القرآن ڈاکٹر محمد طاہرالقادری نے بھی ٹوئٹ کیا اور کہا کہ ’’سیاست خدمت و عبادت کا دوسرا نام ہے، نظام کی اصلاح کا جو پیغام 23 دسمبر کے دن قوم کو دیا گیا آج ہر جماعت اور طبقہ فکر کے افراد اس کی حقانیت اور ناگزیریت کا اعتراف کر رہے ہیں‘‘۔

چیئرمین سپریم کونسل ڈاکٹر حسن محی الدین قادری نے اپنے ٹوئٹ میں کہا کہ ’’23 دسمبر 2012 کے دن قائد تحریک منہاج القرآن نے نظام کی اصلاح کیلئے جو ایجنڈا دیا تھا اسے آج حکومت اور اپوزیشن کی ساری جماعتیں مان رہی ہیں کہ ہاں ! تمام برائیوں کی جڑ دھاندلی زدہ انتخابی نظام ہے۔

صدر منہاج القرآن انٹرنیشنل ڈاکٹر حسین محی الدین قادری نے اپنے ٹوئٹ میں کہا کہ شیخ الاسلام نے 23 دسمبر 2012 کو مینار پاکستان کے سائے تلے ’’سیاست نہیں ریاست بچاؤ ‘‘ کا نعرہ دیا تھا اور تاریخ میں پہلی بار کسی شخصیت نے قومی جسم کو لاحق مرض کی تشخیص کرنے کے ساتھ ساتھ اس کا علاج بھی تجویز کیا‘‘۔

پاکستان عوامی تحریک کے سیکرٹری جنرل خرم نواز گنڈاپور نے کہا کہ موجودہ نظام آدم خور ہے، ڈاکٹر طاہرالقادری نے افرادی قوت کے اعتبار سے ریکارڈ ساز جلسہ کے شرکاء کو بتا دیا تھا کہ یہ نظام پاکستان کے ہر مسئلے کی جڑ ہے۔

پاکستان عوامی تحریک کے مرکزی سیکرٹری اطلاعات نور اللہ صدیقی نے کہا کہ موجودہ نظام ظلم اور جرائم کی پرورش کردہ ہے۔ 23 دسمبر کے دن پاکستان کے عوام نے اس نظام کے خلاف اپنی نفرت کا اظہار کیا تھا۔

سوشل میڈیا ورکنگ کونسل کے ہیڈ فرخ شہزاد نے اپنے ٹوئٹ میں کہا کہ جادو وہ جو سر چڑھ کر بولے۔ انہوں نے کہاکہ نظام کے بارے میں جو باتیں ڈاکٹر طاہرالقادری نے 8 سال قبل کی تھیں آج وہ ساری باتیں حکومت اور اپوزیشن کی زبانوں پر ہیں۔

ٹوئٹر پر جاری رہنے والے ٹرینڈ میں عوامی تحریک، منہاج القرآن، منہاج القرآن ویمن لیگ، منہاج یوتھ لیگ، مصطفوی سٹوڈنٹس موومنٹ، سوشل میڈیا ورکنگ کونسل اور منہاج سائبر کے ہزاروں ایکٹویسٹ نے اظہار خیال کیا اور حکومت کی توجہ تبدیلی کے نعرے کی طرف مبذول کروائی۔