یوم دفاع پر پاکستان عوامی تحریک کے وفد کی باٹاپور میں شہداء کی یادگاروں پر حاضری

یوم دفاع کے موقع پر پاکستان عوامی تحریک کے سیکرٹری جنرل خرم نواز گنڈاپور کی قیادت میں عوامی تحریک اور منہاج القرآن کے سینئر رہنماؤں کے ایک وفد نے باٹا پور میں شہداء کی یادگاروں پر حاضری دی، وفد نے پھولوں کی چادریں چڑھائیں اور ان کے درجات کی بلندی کے لیے دعا کی۔ اس موقع پر مرکزی سیکرٹری اطلاعات نوراللہ صدیقی، سیکرٹری کوآرڈینیشن عارف چودھری، ڈائریکٹر انٹرفیتھ سہیل احمد رضا، ثاقب بھٹی و دیگر عہدیداران و کارکنان موجود تھے۔

یہاں میڈیا کے نمائندوں سے گفتگو کرتے ہوئے خرم نوازگنڈاپور نے کہا کہ پاکستان شہداء کے خون کے نذرانے سے وجود میں آیا اور شہداء کا خون ہی اس ملک کی حفاظت کررہا ہے اور مستقبل میں بھی اگر کسی اندرونی، بیرونی دشمن نے ہماری سلامتی پر بری نگاہ ڈالی تو پاکستان کے کروڑوں عوام اپنی افواج کے شانہ بشانہ ان کے مذموم عزائم خاک میں ملادیں گے۔ انہوں نے کہا کہ جنگ ستمبر کے شہداء قوم کے ہیرو ہیں، ان عظیم سپوتوں نے حب الوطنی اور جذبہ ایمانی کے ساتھ اپنے سے کئی گنا بڑے دشمن کا مردانہ وار مقابلہ کیا اور دشمن کو ناپاک قدم اپنی سرزمین پر رکھنے کی جرأت نہ ہونے دی۔

انہوں نے مزید کہا کہ پاکستان کے عوام امن پسند ہیں، وہ امن کے ساتھ رہنا چاہتے ہیں، اگر کوئی اپنی طاقت کے زعم میں انسانیت کا خون بہانے کی کوشش کرے گا تو وہ یاد رکھے پاکستان ایٹمی ملک ہے اور یہ ایٹمی صلاحیت ہم نے اپنے دفاع کے لیے حاصل کی ہے۔ جب وطن کی سلامتی پر آنچ آئے گی تو نتائج کی پرواہ کیے بغیر یہ ایٹم بم حرکت میں آئے گا۔