عوامی تحریک اور تحریک منہاج القرآن کا مشترکہ اجلاس، ڈاکٹر طاہر القادری کے استقبال کے انتظامات کا جائزہ

عوامی تحریک کے کارکن ڈاکو بھگانے کیلئے صف اول میں ہونگے: ڈاکٹر حسن محی الدین
8 اگست کو لاہور کے عوام اپنے محبوب قائد ڈاکٹر محمد طاہر القادری کا تاریخ ساز استقبال کرینگے
ایتھوپیا کا کرپٹ وزیر خزانہ جیل گیا، پاکستان میں ثبوتوں کے باوجود پھر وزیر خزانہ بن گیا
تاریخ ن لیگ کے رسم ’’ساتواں ‘‘ کو نہیں لارجر بنچ کے متفقہ فیصلے کو یاد رکھے گی
نااہل وزیراعظم کے حواری ہی ان کو کندھوں پر بٹھا کر جیل چھوڑنے جائینگے۔ اجلاس میں گفتگو

لاہور (5 اگست 2017) پاکستان عوامی تحریک کے سربراہ ڈاکٹر محمد طاہر القادری کے استقبال کی تیاریوں اور انتظامات کے سلسلے میں عوامی تحریک اور منہاج القرآن کا مشترکہ اجلاس مرکزی سیکرٹریٹ ماڈل ٹاؤن میں منعقد ہوا۔ اجلاس کی صدارت عوامی تحریک کے سینئر رہنما ڈاکٹر حسن محی الدین نے کی۔ اجلاس میں فیصلہ کیا گیا کہ ڈاکٹر محمد طاہر القادری کا 8 اگست کو لاہور ایئرپورٹ پر تاریخ ساز استقبال کیا جائیگا۔ سربراہ عوامی تحریک ایئرپورٹ سے مزار داتا علی ہجویری پر حاضری دینگے اور نوافل ادا کرینگے۔ اجلاس میں قائدعوامی تحریک کے استقبال کی تیاریوں اور انتظامات کو حتمی شکل دی۔

مشترکہ اجلاس سے خطاب کرتے ہوئے ڈاکٹر حسن محی الدین نے کہا کہ ایتھوپیا میں کرپشن کے الزام پر وزیر خزانہ کو ان کے عہدے سے ہٹا کر گرفتار کیا گیا اور سزا دی گئی مگر ہمارا وزیر خزانہ کرپشن کے ثبوتوں کے باوجود پھر وزیر خزانہ بن گیا۔ انہوں نے کہا کہ تاریخ رسم ’’ساتواں ‘‘کو نہیں لارجر بنچ کے متفقہ فیصلے کو یاد رکھے گی۔ انہوں نے مزید کہا کہ عوامی تحریک کا مطالبہ ہے کہ جسٹس باقر نجفی کمیشن کی رپورٹ کو پبلک کیا جائے۔ عوامی تحریک کے غیور کارکنوں نے فرعون صفت حکمرانوں کی آنکھوں میں آنکھیں ڈال کر جرآت و بہادری کا مظاہرہ کیا، وقت آگیا ہے کہ ریاستی اداروں کو سیاست سے پاک کیا جائے۔

انہوں نے کہا کہ ماڈل ٹاؤن میں 14 بے گناہ شہریوں کو شہید کیا گیا۔ 85 لوگوں کو گولیوں سے چھلنی کیا گیا۔ شریف برادران انصاف کی راہ میں رکاوٹ ہیں۔ سفاک حکمرانوں کے نزدیک اقتدار اہم ہے۔ یہ اقتدار کیلئے ملک و قوم کا سودا کرنے سے بھی گریز نہیں کرتے۔ انہوں نے کہا کہ کوئی غلط فہمی میں نہ رہے۔ شہدائے ماڈل ٹاؤن کا قصاص لے کررہیں گے۔ تین سال گزر گئے ماڈل ٹاؤن کے شہداء کو انصاف نہیں ملا، ہماری امن پسندی کو کمزوری نہ سمجھا جائے۔ وقت آنے پر عوامی تحریک کے کارکن ملک بچانے اور ڈاکو بھگانے کیلئے سب سے آگے ہونگے۔ ظالم نظام بدلنے کی جدوجہد منطقی انجام تک پہنچائیں گے۔ قاتل حکمرانوں اور کرپٹ نظام کی گرتی ہوئی دیوار کو آخری دھکے کی ضرورت ہے۔

انہوں نے کہا کہ 8 اگست کو لاہور کے عوام اپنے محبوب قائد کا تاریخ ساز استقبال کرینگے۔ نااہل وزیراعظم کا استقبال کرنے والے ان کے حواری ہی ان کو کندھوں پر بٹھا کر جیل چھوڑنے جائینگے۔ شریف برادران نے ماڈل ٹاؤن میں بے گناہوں کا خون بہایا۔ بچوں کو یتیم کیا، اس کا انہیں حساب دینا ہو گا۔ اجلاس میں سیکرٹری جنرل عوامی تحریک خرم نواز گنڈاپور، بریگیڈیئر(ر) محمد اقبال، انجینئر رفیق نجم، رانا ادریس، جواد حامد، علامہ میر آصف اکبر اور دیگر قائدین تحریک موجود تھے