کرپشن کے خاتمے کی تحریک میں عمران خان کے ساتھ ہیں: ڈاکٹر طاہرالقادری
انہوں نے ٹیلی فون پر دعوت دی جو میں نے قبول کر لی، خرم نواز
گنڈا پور کو رابطوں کی ہدایات دے دیں۔
دونوں جماعتوں کے وفود ملاقات میں تفصیلات طے کریں گے، قصاص تحریک میں پی ٹی آئی
ہمارے ساتھ ہے۔
سانحہ ماڈل ٹاؤن کے قصاص کے حوالے سے تحریک انصاف پہلے کی طرح اب بھی ہمارے ساتھ ہے: ڈاکٹر طاہرالقادری
تحریک انصاف کے سربراہ عمران خان نے 24 اکتوبر 2016ء کی شب پاکستان عوامی تحریک کے قائد ڈاکٹر طاہرالقادری سے ٹیلی فون پر رابطہ کیا اور اسلام آباد احتجاج میں شرکت کی باقاعدہ دعوت دی، جو انہوں نے قبول کر لی۔ ڈاکٹر طاہرالقادری نے کہا کہ کرپشن کے خاتمے کی تحریک وہ عمران خان کے ساتھ ہیں اور ہماری جماعت اسلام آباد کے احتجاج میں شریک ہوگی۔ عمران خان نے متنازعہ بیانات پر ڈاکٹر طاہرالقادری سے معذرت بھی کی ہے جس پر انہوں نے کہا کہ معذرت کرنے کی قطعاً ضرورت نہیں، تاہم اب ہمیں آگے کی بات کرنی ہے۔
ڈاکٹر طاہرالقادری نے کہا کہ سانحہ ماڈل ٹاؤن کے قصاص کے حوالے سے تحریک انصاف پہلے کی طرح اب بھی ہمارے ساتھ ہے اور کرپشن کے خاتمے کی تحریک میں ہم ہر اس شخص کا ساتھ دیں گے جو ظلم کے نظام کو بدلنے کیلئے باہر نکلے گا۔ موجودہ حکمرانوں نے ہمارے 14 بے گناہ کارکنوں کی لاشیں گرائیں، بے گناہ کارکنوں کا خون ہم پر قرض ہے، انصاف کیلئے مرتے دم اور آخری سانس تک لڑیں گے اور کبھی سرنڈر نہیں کریں گے۔
ڈاکٹر طاہرالقادری نے واضح کیا کہ ایک سیاسی جماعت ہے۔ قصاص تحریک کے علاوہ بھی کرپشن، دہشتگردی، آئین کے آرٹیکل 1 سے لے کر 40 تک پر عمل درآمد قومی ایشوز ہیں اور یہ ہمارے سیاسی ایجنڈے کا حصہ ہیں۔ 2 نومبر کے دھرنے کے حوالے سے عوامی تحریک اور تحریک انصاف دونوں جماعتوں کے وفود آپس میں ملاقات کریں گے اور احتجاجی تحریک کی جزئیات طے کریں گے۔ اس حوالے سے ڈاکٹر طاہرالقادری نے پارٹی کے سیکرٹری جنرل خرم نواز گنڈا پور کو ضرور ی ہدایات دے دیں ہیں۔
دریں اثناء پاکستان عوامی تحریک کے مرکزی سیکرٹری اطلاعات نور اللہ صدیقی نے بتایا کہ سربراہ عوامی تحریک اس وقت انٹرنیشنل سیرت کانفرنس میں شرکت کے سلسلے میں اردن میں ہیں۔27 اکتوبر کے بعد وہ لندن آئیں گے، جہاں سے وہ مراکو جائیں گے۔ مراکو کے بعد بھی انکی کچھ مزید عالمی مصروفیات ہیں تاہم تحریک انصاف اور عوامی تحریک کے قائدین اگلے 24 گھنٹے میں ملاقات کریں گے۔
تبصرہ