اسلام آباد: عوامی تحریک کے ڈپٹی چیف آرگنائزر کی برازیلی سفیر کلاڈیو لنز سے ملاقات

پاکستان عوامی تحریک کے ڈپٹی چیف آرگنائزر شہزاد حسین نقوی نے برازیلی سفارتخانہ اسلام آباد میں برازیل کے سفیر کلاڈیو ریجا گیبگیلیا لنز سے ملاقات کی۔ ملاقات میں پاکستان اور برازیل کے عوامی سطح پر ثقافتی و سماجی تعلقات میں تعاون، فروغِ امن، انسدادِ دہشتگردی اور ڈاکٹر محمد طاہرالقادری کے مرتب کردہ ’نصابِ امن‘ پر تبادلہ خیال کیا گیا۔

ملاقات میں شہزاد نقوی کا کہنا تھا کہ شیخ الاسلام ڈاکٹر محمد طاہرالقادری عالمی قیام امن، بین المسالک ہم آہنگی و بین المذاہب رواداری کے فروغ، اِنتہا پسندی و دہشت گردی کے خاتمے کے لیے بےمثال خدمات سرانجام دے رہے ہیں۔ شیخ الاسلام نے دہشت گردی کے خلاف فکری جہاد کرتے ہوئے Fatwa on Terrorism and Suicide Bombings اور نصاب امن کے علاوہ درجنوں کتب انسدادِ دہشتگردی اور فروغِ امن کے موضوع پر تحریر کی ہیں اور ملکی و بین الاقوامی سطح پر بےشمار لیکچرز و خطابات بھی دے چکے ہیں۔ ڈاکٹر طاہرالقادری نے ہمیشہ امن و سلامتی، محبت و شفقت، احترامِ انسانیت اور عدم تشدد کی تعلیمات دی ہے۔ منہاج ایجوکیشن سوسائٹی، منہاج یونیورسٹی، منہاج ویلفیئر فاؤنڈیشن، یتیم بچوں کی کفالت کا ادارہ آغوش اور مستحق اور نادار بچیوں کا ادارہ بیت الزہراء ان کی طرف سے فروغِ امن و سلامتی اور خیر و بھلائی کے عملی اقدامات ہیں۔