یوم دفاع پر عوامی تحریک کے وفد کی یادگارِ شہداء پر حاضری

پاکستان عوامی تحریک کے سربراہ ڈاکٹر طاہرالقادری کی طرف سے عوامی تحریک کے وفد نے جنگ ستمبر کے شہید میجر شبیر شریف شہید اور باٹاپور شہداء کی یادگار پر پھولوں کی چادر چڑھائی اور فاتحہ خوانی کی۔ عوامی تحریک کے وفد میں مرکزی سیکرٹری اطلاعات نوراللہ صدیقی، ڈائریکٹر انٹرفیتھ ریلیشنز سہیل رضا، شہزاد رسول اور میاں طاہر یعقوب شامل تھے۔ باٹاپور میں شہداء کی یادگار پر پھولوں کی چادر چڑھانے کے بعد میڈیاسے گفتگو کرتے ہوئے نوراللہ صدیقی نے کہا کہ پاکستان غازیوں اور شہداء کی سرزمین ہے اسے نقصان پہنچانے والے رسوا ہونگے۔پاکستان کی بقاء کیلئے جانوں کی قربانیاں دینے کا جو سفر افواج پاکستان نے 1965 ء سے شروع کیا وہ آج بھی جاری ہے۔ آپریشن ضرب عضب میں افواج پاکستان کے افسران اور جوانوں نے مادر وطن کیلئے بے مثال قربانیاں دیں ہیں۔ ان قربانیوں پر پوری قوم کو اپنی بہادر اور محب وطن افواج پر فخر ہے۔ انہوں نے کہاکہ پاکستان کے دفاع کو ناقابل تسخیر بنانے اور پاکستان کو اندرونی و بیرونی سازشوں سے محفوظ رکھنے کیلئے دہشت گردی اور کرپشن کے گڑھ جوڑ کو ہر حال میں توڑنا ہو گا۔