عوامی تحریک کے وفد کی سیاسی جماعتوں کے رہنماؤں سے ملاقاتیں، تحریک قصاص میں شرکت کی دعوت
پاکستان عوامی تحریک کے سربراہ ڈاکٹر محمد طاہرالقادری کی ہدایت پر پاکستان عوامی تحریک لاہور کے وفد نے 17 اگست 2016 کو مختلف اپوزیشن جماعتوں کے راہنماؤں سے ملاقاتیں کیں اور انہیں 20 اگست کو ’تحریکِ قصاص و احتساب‘ کے لاہور میں ہونے والے احتجاج میں شرکت کی دعوت دی۔ وفد میں پاکستان عوامی تحریک لاہور کے صدر چودھری محمد افضل گجر، نائب صدر عباس خان اور تحریک منہاج القرآن لاہور کے امیر حافظ غلام فرید شامل تھے۔ وفد نے پاکستان پیپلز پارٹی کے راہنما خرم جہانگیر وٹو، پاکستان مسلم لیگ کے راہنما میاں محمد منیر، جماعت اسلامی کے راہنما حافظ سلیمان بٹ، مجلس وحدت المسلمین کے راہنما علامہ حسن ہمدانی اور پاکستان کسان اتحاد کے رہنماؤں سے ملاقاتیں کیں اور انہیں ’قصاص و احتساب مارچ اور دھرنے میں شرکت کی دعوت دی۔ اپوزیشن جماعتوں کے رہنماؤں نے ملاقات میں پاکستان عوامی تحریک کے وفد کو کارکنوں سمیت اپنی شرکت کا یقین دلایا۔ وفد نے پاکستان کسان اتحاد کے چیئرمین چودھری انور اور راؤ طارق اشفاق سے بھی ملاقات کی۔ حافظ غلام فرید نے پی ٹی آئی کی ایم پی اے سعدیہ سہیل رانا سے بھی ٹیلیفون پر رابطہ کیا اور انہیں بھی احتجاج میں شرکت کی دعوت دی۔ رہنماؤں نے بتایا کہ تمام سیاسی جماعتوں کے رہنماؤں نے عوامی تحریک کے وفد کو یقین دلایا ہے کہ وہ شہدائے ماڈل ٹاؤن کے ورثاء کے ساتھ ہیں اور ہم ڈاکٹر طاہرالقادری کے انصاف کے مطالبہ کی حمایت کرتے ہیں۔ انہوں نے کہا کہ جب تک طاقتوروں کو انصاف کے کٹہرے میں کھڑا نہیں کیا جائیگا تب تک عام شہریوں پر انصاف کے بند دروازے نہیں کھلیں گے۔ چودھری محمد افضل اور حافظ غلام فرید نے احتجاج میں شرکت کی دعوت قبول کرنے پر رہنماؤں کا شکریہ ادا کیا۔
تبصرہ