ڈنمارک: پاکستان عوامی تحریک کے زیراہتمام جشن آزادی کے موقع پر شہداء کے لیے قرآن خوانی

کوئٹہ دھماکے میں 73 پاکستانیوں کی شہادت پر ہر محب وطن دکھی ہے، پاکستان عوامی تحریک ڈنمارک نے جشن آزادی کے موقع پرخوشی کی روایتی تقاریب کو منسوخ کرکے شہدا کے لیے قرآن خوانی اور ایصال ثواب کی محفل کا اہتمام کیا۔ خواتین و حضرات نے شہداء کے لیے قرآن خوانی کی، پروگرام کے دوسرے حصے کا آغاز قاری ندیم اختر نے تلاوت کلام مجید سے کیا، جس کے بعد صدر پاکستان عوامی تحریک ڈنمارک نے استقبالیہ کلمات پیش کیے اور پروگرام میں شرکت کے لیے دوسرے شہروں سے آنے والے مہمانوں کا شکریہ ادا کیا۔

پاکستان عوامی تحریک ڈنمارک کے سینئر رہنما محمد اکرم جوڑا نے اپنی تقریر میں جدوجہد آزادی میں جانیں قربان کرنے والوں کو خراج عقیدت پیش کیا۔ مہمان مقرر قاری ظہیر احمد نے پاکستان کی موجودہ حالات پر اظہار افسوس کرتے ہوئے قائداعظم کے فرمودات کی روشنی میں پاکستان کی کامیابی کے راستے کی نشاندہی کی۔ آخر میں عبدالستار سراج نے شہداء کے لیے فاتحہ خوانی اور پاکستان کے امن اورکامیابی کے لیے خصوصی دعا کی۔ بعد ازاں مہمانوں کو کھانا پیش کیاگیا۔

رپورٹ: محمد منیر طاہر