ڈاکٹر حسن قادری کا این اے 154 کا دورہ، انتخابی جلسوں سے خطابات

چیئرمین سپریم کونسل تحریک منہاج القرآن ڈاکٹر حسن محی الدین قادری نے ڈیرہ جنڈ، شہید چوک اور پل بہشتی لودھراں حلقہ این اے 154 میں انتخابی جلسوں سے خطاب کرتے ہوئے کہا کہ لوگو حق اور ضمیر کی آواز پر ووٹ دینا۔ خواجہ عامر فرید کوریجہ حق کی آواز ہیں، لودھراں کے عوام 23 دسمبر کو عوامی تحریک کے امید وار عامر فرید کوریجہ کو ووٹ دے کر کامیاب بنائیں۔

انہوں نے کہا کہ عوامی تحریک اقتدار کیلئے نہیں اقدار اور عوام کے وقار کیلئے سیاسی جدوجہد کررہی ہے۔ ماڈل ٹاؤن میں بے گناہوں کا خون بہانے والے حکمران ملک و قوم سے مخلص نہیں۔ یہ عوام کا جان و مال نہیں صرف ’’مال‘‘ محفوظ کررہے ہیں۔ انہوں نے کہا کہ الیکشن کے نام پر پسندیدہ شخص کی سلیکشن کا کھیل کھیلنے کیلئے حکمرانوں نے میدان تیار کر لیا ہے، الیکشن کمیشن کرپشن کو تحفظ دینے میں تنہا نہیں بلکہ اور بھی طاقتور پہلون اسکے پیچھے کھڑے ہیں، نا اہلوں کو انتخابات کیلئے اہل قرار دینا آئین و قانون کے محافظ اداروں کا طے شدہ ایجنڈا ہے۔

ڈاکٹر حسن قادری نے کہا کہ ناانصافی اور انتہا پسندی کے خاتمہ کیلئے عوام عوامی تحریک کو ووٹ دیں۔ لودھراں کے عوام دولت اور حکومتی غنڈہ گردی کو مسترد کردیں۔