ملتان: جھوٹ اور ظلم کی سیاست کا خاتمہ کرکے عوامی خدمت کی بنیاد رکھیں گے۔ چودھری اکرم گجر

ملتان (27 نومبر 2015ء) پاکستان عوامی تحریک کے رہنما چوہدری محمد اکرم گجر نمبردار نے کہا ہے کہ جھوٹ، ظلم اور کرپشن کی سیاست کا خاتمہ کرکے عوامی خدمت کی بنیاد رکھیں گے۔ پاکستان عوامی تحریک خدمت برائے تجارت نہیں بلکہ سیاست برائے خدمت کے اصول پر میدان میں آئی ہے۔ ہم سیاست کو سنت نبوی صلی اللہ علیہ وآلہ وسلم اور عبادت سمجھ کر کرتے ہیں اور وہ دن دور نہیں جب پاکستان عوامی تحریک ہی اس ملک کی سب سے بڑی سیاسی قوت بن کر میدان میں ابھرے گی۔ انہوں نے کہا کہ یونین کونسل بنگل والہ میں جتنے امیدوار بھی میدان میں ہیں ان میں پاکستان عوامی تحریک کے امیدوار پیر سید خضر مرتضیٰ گردیزی کو اخلاقی برتری حاصل ہے اور 05 دسمبر کو خضرمرتضیٰ گردیزی ہی کامیاب ہونگے۔ اس موقع پر خطاب کرتے ہوئے پاکستان عوامی تحریک کے رہنما راؤ عظمت علی نے کہا کہ سانحہ ماڈل ٹاؤن میں عوام کا قتل عام کرنے والے اب کس منہ سے ووٹ مانگ رہے ہیں۔ عوام کو چاہیے کہ ایسے قاتل حکمرانوں کے نمائندوں کو مسترد کردیں۔ حکومت اپنے اوچھے ہتھکنڈوں سے حق اور سچ کا مقابلہ نہیں کرسکتی۔ فتح بالاخر حق اور سچ کی ہی ہوگی۔ اس موقع پر راؤ آصف رزاقی، راؤ احمد علی اور دیگر نے بھی خطاب کیا۔