سپین: پاکستان عوامی تحریک کی جانب سے پاکستان تحریک انصاف کے اعزاز میں افطارڈنر کا اہتمام

ڈاکٹر طاہرالقادری جیسی شخصیت عالم اسلام کیلئے سرمایہ افتخار ہیں، انہوں نے اور عمران خان نے ہمیشہ ملک و قوم کے مفاد میں سیاست کی ہے
پاکستان تحریک انصاف اور پاکستان عوامی تحریک کا سپین میں ملکر لائحہ عمل اپنانے پر اتفاق، مشترکہ کاز کیلئے جدوجہد بھی مشترکہ ہونی چاہیے

بارسلونا (یوسف چوہدری) پاکستان عوامی تحریک سپین کیجانب سے پاکستان تحریک انصاف سپین کے اعزاز میں گزشتہ روز پارٹی کے بارسلونا آفس میں افطارڈنر کا اہتمام کیا گیا، اس دوران شرکاء نے اپنے خیالات کا اظہار کرتے ہوئے کہا کہ ڈاکٹر طاہرالقادری جیسی شخصیت عالم اسلام کیلئے سرمایہ افتخار ہیں، ڈاکٹر طاہرالقادری اور عمران خان نے ہمیشہ ملک و قوم کے مفاد میں سیاست کی ہے، پاکستان تحریک انصاف اور پاکستان عوامی تحریک کا سپین میں ملکر لائحہ عمل اپنانے پر اتفاق، مشترکہ کاز کیلئے جدوجہد بھی مشترکہ ہونی چاہیے۔ تفصیلات کے مطابق پاکستان عوامی تحریک کی جانب سے سیاست نہیں ریاست بچاؤ کی پالیسی پر عمل پیرا رہتے ہوئے جس طرح پاکستان میں مختلف سیاسی جماعتوں کے ساتھ ملکرغربت، لاقانونیت، بے انصافی، رشوت اور بدامنی کیخلاف مشترکہ جدوجہد کا آغاز کیا گیا ہے اسی طرح سپین میں بھی آپس میں پیار اور بھائی چارے کی فضا قائم رکھنے کیلئے ماہ رمضان المبارک کی بابرکت گھڑیوں کو موقع غنیمت جانتے ہوئے پاکستان عوامی تحریک سپین نے بھی مختلف سیاسی و سماجی پارٹیوں کے اعزاز میں افطار ڈنر کے ایک سلسلہ کا آغاز کیا ہے۔

اس سلسلہ کی ابتدا 30 جون بروز منگل کو پاکستان تحریک انصاف سپین کی ایگزیکٹو باڈی کے اعزاز میں افطار ڈنر کے اہتمام سے ہوئی، افطار ڈنر کا اہتمام پاکستان عوامی تحریک سپین کے آفس کائیے سیرا، بارسلونا میں کیا گیا جس میں پاکستان تحریک انصاف کے شبیر طاہر، راجہ امجد خالق، عمران اسحاق، چوہدری ناصر محمود، چوہدری کامران، انور بھائی، شیخ فاروق، صفدر بٹ، لالہ زمان اور پاکستان عوامی تحریک سپین کے صدر محمد اقبال چوہدری، نائب صدر چوہدری طارق مہدی، جنرل سیکرٹری راحیل اکرم ایڈووکیٹ، چیف آرگنائزر چوہدری امتیاز احمد آکیہ، سیکرٹری اطلاعات چوہدری محمد یوسف، سیکرٹری کوآرڈینیشن چوہدری محمد افضال گوندل، جوائنٹ سیکرٹری عمران آفتاب، ڈپٹی سیکرٹری محمد بلال سرور جبکہ منہاج مصالحتی کونسل سپین کے صدر چوہدری امانت حسین مہر، منہاج القرآن سپین کے نائب صدر نوید احمد اندلسی، سیکرٹری سوشل میڈیا عوامی تحریک بیسوس وقار الحسن اور دیگر شریک تھے۔

افطار ڈنر میں شریک پاکستان تحریک انصاف سپین کے رہنماؤں نے منہاج القرآن انٹرنیشنل اور پاکستان عوامی تحریک سمیت مختلف شعبہ جات کی تعریف کرتے ہوئے ڈاکٹر محمد طاہرالقادری کو پاکستان اور عالم اسلام کیلئے سرمایہ افتخار قرار دیا۔ انہوں نے کہا کہ ڈاکٹر طاہرالقادری اور عمران خان نے ہمیشہ ملک و قوم کے مفاد میں سیاست کی ہے اور آئندہ بھی پاکستان تحریک انصاف مشرکہ کاز کیلئے پاکستان عوامی تحریک کے ساتھ ملکر چلے گی، ملک میں رائج جاگیردارانہ، وڈیرانہ اور سرمایہ دارانہ نظام کے خاتمے تک کوششیں جاری رکھیں گے۔

پاکستان عوامی تحریک سپین کے صدر محمد اقبال چوہدری نے آنیوالے تمام معزز مہمانوں کا شکریہ ادا کرتے ہوئے کہا کہ ہمارے قائد ڈاکٹر محمد طاہرالقادری کی تمام زندگی لوگوں کی فلاح و بہبود کرتے ہوئے گزر رہی ہے۔ انہوں نے تن تنہا سفر کا آغاز کیا تھا جو آج ایک انقلاب کی شکل اختیار کر چکا ہے۔ ان شاءاللہ وہ وقت دور نہیں جب پاکستان میں حق اور سچ کی فتح ہوگی اور ملک کے غریب عوام کو کرپٹ حکمرانوں اور کرپٹ نظام سے نجات ملے گی۔ افطار ڈنر میں پاکستان سمیت سپین میں مقیم پاکستان کمیونٹی کے مختلف امور پر گفتگو بھی ہوئی اور آئندہ پاکستان کمیونٹی کو درپیش مسائل کے حل کیلئے بھی کوششیں جاری کرنے پر اتفاق کیا گیا۔