محمد اقبال چوہدری کی زیر صدارت پاکستان عوامی تحریک سپین کے اجلاس میں اہم فیصلہ جات
25 مئی کو یوم تاسیس منانے اور 17 جون کو سانحہ ماڈل ٹاؤن کے خلاف
احتجاج کرنے کا اعلان
اجلاس میں پاکستان عوامی تحریک سپین کے مرکزی عہدیداران کے علاوہ اوسپیتالیت اور بیسوس
تنظیم کی مرکزی قیادت کی بھی شرکت
بارسلونا (یوسف چوہدری) پاکستان عوامی تحریک سپین کے آفس میں عوامی تحریک سپین کے صدر محمد اقبال چوہدری کی زیرصدارت ایک اہم اجلاس منعقد کیا گیا جس میں پاکستان عوامی تحریک سپین کی مرکزی قیادت کے علاوہ اوسپیتالیت اور بیسوس کی تنظیموں کے سینئر عہدیداران نے بھی شرکت کی۔ اجلاس کا باقاعدہ آغاز تلاوت قرآن پاک اور نعت رسول مقبول صلی اللہ علیہ وآلہ وسلم سے کیا گیا جس کی سعادت اوسپیتالیت تنظیم کے صدر شہباز علی چیمہ نے حاصل کی۔ بعدازاں سیکرٹری جنرل عوامی تحریک سپین راحیل اکرم ایڈووکیٹ نے اجلاس کا ایجنڈا پیش کیا اور صدر محمد اقبال چوہدری نے مختلف امور پر تفصیلی بریفنگ دی۔ اجلاس میں شریک تمام اراکین کی متفقہ رائے سے 25 مئی کو پاکستان عوامی تحریک کے یوم تاسیس کے موقع پر پروقار تقریب کے انعقاد کی منظوری دی گئی، جبکہ ماڈل ٹاؤن میں شہید ہونیوالے کارکنان اور پاکستانی تاریخ کی بدترین حکومتی دہشتگردی کے خلاف 17 جون کو پاکستانی قونصلیٹ کے سامنے احتجاج کا فیصلہ کیاگیا۔
اس موقع پر پاکستان عوامی تحریک سپین کے صدر محمد اقبال چوہدری نے واضح کرتے ہوئے کہا کہ احتجاج کرنا ہمارا حق ہے اور ہم یہ احتجاج حکومتی دہشتگردی کے خلاف کریں گے۔ انہوں نے کہا کہ پاکستان ہمارا ملک ہے ہماری پہچان ہے اور ہم پاکستان کو ان قاتلوں، چوروں، ڈاکوؤں اور لٹیرے حکمرانوں سے نجات دلوا کر ہی دم لیں گے۔
پاکستان عوامی تحریک سپین کے اجلاس میں سپین بھر کے مختلف علاقوں میں تنظیم سازی کیلئے کوآرڈینیٹر مقرر کرنے کا فیصلہ بھی کیا گیاجس کے لیے عنقریب علاقوں کا تعین کر کے مختلف سیاسی اور علاقائی اثرو رسوخ رکھنے والی شخصیات سے ملاقاتوں کا شیڈول مرتب کیا جائے گا۔ اجلاس میں اوسپیتالیت تنظیم کی تقریب حلف برداری کیلئے ایک پروقار تقریب کے انعقاد کا اعلان بھی کیا گیا جس کی حتمی تاریخ کا فیصلہ اوسپیتالیت تنظیم اپنے ممبران کی مشاورت کے بعد کرے گی جبکہ پاکستان عوامی تحریک بیسوس کے کامیاب جلسے اور تقریب حلف برداری پر عوامی تحریک بیسوس کے عہدیدران کو مبارکباد پیش کی گئی۔
حال ہی میں کامیابیوں کی منازل طے کرتے ہوئے ضلع گجرات سے تعلق رکھنے والے بارسلونا کے پاکستانی طالب علم فیصل اشفاق کو خصوصی طور پراجلاس میں مدعو کیا گیا تھا، فیصل اشفاق بارسلونا شہر میں پہلے ٹاؤن لیول پر نمائندہ طلبہ اور پھر بارسلونا سٹی کی بلدیہ عظمی کے شعبہ تعلیم کے مشاورتی ادارے میں طلبہ کا نمائندہ منتخب ہونے پر فیصل اشفاق کی حوصلہ افزائی کی گئی اور مزید کامیابی کے لیے دعا اور نیک خواہشات کا اظہار کیا گیا۔ اجلاس کے اختتام پر گزشتہ دنوں گلگت بلتستان میں ہیلی کاپٹر حادثہ کے نتیجہ میں قیمتی جانوں کے ضیاع پر گہر غم کا اظہار کیا گیا اور اس میں شہید ہونے والوں کے لیے دعائے مغفرت کی گئی۔
پاکستان عوامی تحریک سپین کے اس اجلاس میں خصوصی شرکت کرنیوالوں میں اوسپتالیت سے صدر شہباز علی چیمہ، سیکرٹری ممبر شپ سید رفاقت حسین شاہ، بیسوس سے صدر یاسر عرفان نمبر دار، نائب صدر عامر سہیل، سیکرٹری جنرل زاہد عباس جوائنٹ سیکرٹری افگن نثار جبکہ مرکزی عہدیداران میں سے نائب صدر عوامی تحریک سپین چوہدری طارق مہدی، سیکرٹری جنرل راحیل اکرم ایڈووکیٹ، سیکرٹری اطلاعات یوسف چوہدری، ڈپٹی چیف آرگنائزر حاجی طاہر جاوید، ڈپٹی سیکرٹری عمران آفتاب، سیکرٹری کوآرڈینیشن محمد افضال گوندل، سیکرٹری فنانس چوہدری محمد زمان، سیکرٹری ممبر شپ قدیر حسین چوہدری اور ڈپٹی سیکرٹری اطلاعات حسن طاہر بیگہ شامل ہیں۔ اجلاس کے اختتام پر محمد اقبال چوہدری کی طرف سے تمام ممبران کے اعزاز میں عشائیہ بھی دیا گیا۔
تبصرہ