سپین: پاکستان عوامی تحریک بیسوس کے زیراہتمام تنظیم سازی کی تقریب

بارسلونا (یوسف چوہدری) پاکستان عوامی تحریک بیسوس کے زیراہتمام تنظیم سازی کی تقریب کا انعقاد کیا گیا جس میں اہل علاقہ نے بڑی تعداد کے علاوہ منہاج القرآن انٹرنیشنل سپین کی قیادت کی بھرپور شرکت کی۔ اس موقع پر کثیر تعداد میں افراد نے پاکستان عوامی تحریک میں شمولیت اختیار کی۔ یاسر عرفان نمبردار کی قیادت پر اہلیان علاقہ نےمکمل اعتماد کا اظہار کیا جبکہ پاکستان عوامی تحریک سپین کے صدر محمد اقبال چوہدری نے نومنتخب 15 رکنی تنظیم سے حلف لیا۔ تفصیلات کے مطابق سپین بھر میں پاکستان عوامی تحریک کی تنظیم سازی کے دوسرے مرحلہ میں گزشتہ اتوار کو بارسلونا سپین کے ٹاؤن سن مارتی کے محلہ بیسوس میں تنظیم کا قیام عمل میں لایا گیا، اس سے قبل اوسپیتالیت میں تنظیم سازی کی گئی تھی جس کے بعد بارسلونا شہر کے ٹاؤن سانت مارتی کے محلہ بیسوس میں پاکستان عوامی تحریک سپین کے عہدیداران بلال سرور، چوہدری محمد زمان، چوہدری شرافت علی، چوہدری امتیاز آکیہ اور دیگر کی کاوشوں سے تنظیم کی بنیاد رکھ دی گئی ہے، اہلیان علاقہ کی بھر پور محنت اور محبتوں سے پاکستان عوامی تحریک بیسوس Besos کی تقریب تنظیم سازی جلسہ کی شکل اختیار کرگئی جس میں اہلیان علاقہ کی ایک بڑی تعداد نے شرکت کر کے پاکستان عوامی تحریک بیسوس کی نومنتخب قیادت اور یاسر عرفان نمبردار پر اعتماد کا اظہار کیا۔ ڈپٹی سیکرٹری پاکستان عوامی تحریک سپین بلال سرور کے والد گرامی چوہدری محمد سرور نے جلسہ میں قافلے کی صورت میں شرکت کی۔

جلسہ کا باقاعدہ آغاز تلاوت قرآن پاک سے کیا گیا جس کی سعادت منہاج القرآن لوگرنیو (سپین) کے ڈائریکٹر حافظ غلام مجتبیٰ اندلسی نے حاصل کی جبکہ معروف نعت خوان محمد قدیر احمد خان نے بحضور سرور کائنات صلی اللہ علیہ وآلہ وسلم ہدیہ عقیدت کے گل نچھاور کیے۔ بعد ازاں نوید احمد اندلسی نے پاکستان عوامی تحریک کی جانب سے استقبالیہ پیش کیا، سپین میں پاکستان عوامی تحریک کے قیام کے مقاصد بتائے اور اسٹیج سیکرٹری کے فرائض انجام دئیے۔

جلسہ سے مختصر خطاب میں پاکستان عوامی تحریک سپین کے صدر محمد اقبال چوہدری نے اہلیان علاقہ کی طرف سے بھرپور محبت پر شکریہ ادا کیا۔ انہوں نے کہا کہ جمہوریت اور آمریت کی آنکھ مچولی کا کھیل صرف سزا اور جزا کے نظام ہی سے نہیں بلکہ عوام کی آگہی اور بھرپور شمولیت ہی سے ختم ہوسکتا ہے، اگر ہم اپنے لسانی، سماجی اور فرقہ وارانہ تعصبات سے بالاتر ہو کر صرف نیک نیتی کی بنیادوں پر قیادت کا انتخاب کریں تو پھر نہ تو آمریت کا خوف ہوگا اور نہ ہی جمہوری نظام کی خامیوں کا شکوہ۔ انہوں نے کہا کہ حکومت کا عوام کے صحیح نمائندوں کی امانت بن جانا ہی وہ واحد راستہ ہے جس میں تمام مسائل کا حل موجود ہے اوریہ تب ہی ممکن ہوگا جب عوامی نمائندگی کا نظام پاکستان اور اس کے عوام کے وسیع تر مفاد کو ذاتی مفاد پر فوقیت دے گا ورنہ آمریت ہو یا جمہوریت حکمرانی صرف شخصی مفادات کے تحفظ اور قومی وسائل کی لوٹ کھسوٹ کا ذریعہ ہی بنتی رہے گی۔

محمد اقبال چوہدری نے کہا کہ ہمارا مقصد کسی بھی پارٹی کی مخالفت کرنا نہیں بلکہ ہمارے قائد ڈاکٹر محمد طاہرالقادری تو یہ چاہتے ہیں کہ ملک کے غریب اور مظلوموں کو ان کا حق ان کے دورازے پر دیا جائے نہ کہ وہ اپنے حق کیلئے دوبدر کی ٹھوکریں کھائیں۔ انہوں نے کہا کہ جو حکمران عوام کی خدمت کرتے ہیں وہ ان پر احسان نہیں بلکہ وہ ان کا حق ہی ان کو لٹا رہے ہوتے ہیں اور عوام کو یہ حق پاکستان کا آئین دیتا ہے۔ ہم ملک میں قانون اور انصاف کی حکمرانی چاہتے ہیں نہ کہ جبر پر مبنی شخصی حکمرانی جو کہ مسلسل چلی آرہی ہے۔ محمد اقبال چوہدری نے جلسہ میں شریک تمام لوگوں کو دعوت دی کہ وہ عوامی تحریک کا ساتھ دیں تاکہ پاکستان میں عدل و انصاف کے تقاضے پورے کیے جاسکیں۔

جلسہ میں خصوصی شرکت کرنے والوں میں منہاج القرآن انٹرنیشنل سپین کے سرپرست محمد نواز کیانی، منہاج القرآن انٹرنیشنل سپین کے صدر محمد اکرم بیگ، منہاج مصالحتی کونسل سپین کے صدر چوہدری امانت حسین مہر، صدر مجلس شوریٰ منہاج القرآن سپین حاجی طاہر پرویز، سینئر نائب صدر منہاج القرآن انٹرنیشنل سپین ظل حسن، فنانس سیکرٹری محمد نواز قادری، پاکستان عوامی تحریک سپین کے عہدیداران چوہدری طارق مہدی، راحیل اکرم ایڈووکیٹ، یوسف چوہدری، قدیر حسین چوہدری، حاجی طاہر جاوید، چوہدری افضال گوندل، عمران آفتاب، حاجی محمد افضل، محمد عاطف، بادالونا سے اسد اقبال قادری، راجہ تیمورعلی، فلک شیر، مایہ ناز باکسر پہلوان ظفر، راجہ خالد اور دیگر شامل ہیں۔