راولپنڈی: تاجر ایکشن کمیٹی کے احتجاجی کیمپ میں پاکستان عوامی تحریک کے رہنماؤں کی شرکت

انتظامیہ تاجروں کو لولی پاپ دے کر ٹائم پاس کر رہی ہے۔ غلام علی خان
میٹرو بس منصوبے کے باعث ہزاروں ملازم بے روزگار اور تاجر برادری کے کروڑوں روپے ڈوب گئے

پاکستان عوامی تحریک کے رہنما میڈیا کوآرڈینیٹر غلام علی خان، صدر پی پی 14 امجد عباسی، صدر عوامی یوتھ ونگ وسیم خٹک نے کہا ہے کہ راولپنڈی کی انتظامیہ تاجروں کو لولی پاپ دے کر ڈنگ ٹپاؤ پالیسی پر عمل پیرا ہے، عوامی تحریک عوامی حقوق کی آواز بلند کرتی رہے گی۔ ان خیالات کا اظہار انہوں نے گزشتہ روز تاجر ایکشن کمیٹی راولپنڈی کے زیراہتمام لگنے والے احتجاجی کیمپ میں میڈیا کے نمائندوں سے گفتگو کرتے ہوئے کیا۔ اس موقع پر ملک طاہر جاوید، حاجی عبدالغفور، شیخ جاوید عالم، محسن بھٹی ایڈووکیٹ، جاوید اکبر بٹ، راجہ آصف اقبال، اسامہ ناز اور دیگر بھی موجود تھے۔ انہوں نے کہا کہ میٹرو بس منصوبے میں تاخیر کے باعث مری روڈ کی دکانوں میں کام کرنے والے ہزاروں ملازم بے روزگار ہوگئے، کاروبار نہ ہونے کے باعث دکانداروں کے کروڑوں روپے ڈوب چکے ہیں۔ انہوں نے حکومت سے مطالبہ کیا کہ مری روڈ کو فوری طور پر کلیئر کیا جائے ورنہ احتجاج کا سلسلہ مذید طول پکڑ سکتا ہے۔ بڑے دکانداروں کو نوازنے کے علاوہ چھوٹے دکانداروں کو بھی ریلیف دیا جائے اور دکانوں پر کام کرنے والے ملازمین جو بے روزگار ہوگئے ان کے لئے بھی پیکج کااعلان کیا جائے۔