فیصل آباد: پاکستان عوامی تحریک ملک میں ریاست مدینہ کے دستور کا عملی نفاذ چاہتی ہے۔ میاں کاشف محمود

فیصل آباد: تحریک منہاج القرآن کے ضلعی ناظم میاں کاشف محمود نے کہا ہے کہ پاکستان عوامی تحریک ملک میں ریاست مدینہ کے دستور کا عملی نفاذ چاہتی ہے۔ ریاست مدینہ میں رسول اللہ صلی اللہ علیہ وآلہ وسلم نے عوامی فلاح کا جو نظام قائم کیا تھا اس کی مثل دنیا کی تاریخ میں کہیں نہیں ملتی۔ ڈاکٹر طاہرالقادری عوامی، سماجی اور سیاسی انقلاب کے ذریعے حضور نبی اکرم صلی اللہ علیہ وآلہ وسلم کے دیے گئے نظام کو حقیقی روح میں پاکستان میں نافذ کرنا چاہتے ہیں جس میں پاکستان امت واحدہ کے لیڈر کے طور پر دنیا بھر کے مسلم ممالک کی نمائندگی کرے۔ حضور نبی اکرم صلی اللہ علیہ وآلہ وسلم نے ریاست مدینہ میں قیام امن اور فلاح کا ایک ایسا منصوبہ پیش کیا جس کو تمام مذاہب اور قبائل نے تسلیم کر کے امت واحد کا تصور پیش کیا۔ ان خیالات کا اظہار انہوں نے پی پی 70  کے اجلاس سے خطاب کرتے ہوئے کیا۔ اس موقع پر دلبر حسین قادری، الطاف حسین قادری، حماد احسن، مدثر فاروق، اشتیاق احمد نعیم، مرزا عبدالرزاق، غلام نبی چشتی اور دیگر بھی موجود تھے۔ انہوں نے کہا کہ واقعہ کربلا جابر اور ظالم حکمرانوں کے سامنے سر اٹھا کر کلمہ حق بلند کرنے کی تعلیم دیتا ہے۔ انہوں نے کہا کہ پاکستان عوامی تحریک ملک میں فرقہ واریت، انتہا پسندی، دہشت گردی اور لسانی و گروہی تعصبات کا خاتمہ چاہتی ہے۔