پٹرولیم مصنوعات کی قیمتیں کم ہونے کے باوجود مہنگائی کم نہ ہونا انتہائی تشویشناک ہے۔ محمد رفیق نجم

فیصل آباد: تحریک منہاج القرآن کے مرکزی ناظم تنظیمات انجینئر محمد رفیق نجم نے کہا کہ شدید سرد موسم میں گیس کی بندش کی وجہ سے گھروں کے چولہے بند اور فیکٹریوں کی تالہ بندی ہو رہی ہے۔ وفاق اور پنجاب کی حکومتیں اس بحران کو ختم کرنے میں ناکام ہو گئیں۔ ان خیالات کا اظہار انہوں نے سٹی آفس فیصل آباد میں ضلعی سیکرٹری اطلاعات غلام محمد قادری سے گفتگو کرتے ہوئے کیا۔ انہوں نے کہا کہ فوری طور پر گیس بحران ختم اور جنوری، فروری کے مہینوں کو شدید سردی کے باعث بجلی کی لوڈ شیڈنگ سے بھی مبرا کیا جائے۔ ایل پی جی کی بڑھتی ہوئی قیمتوں کو کنٹرول کیا جائے، پٹرولیم مصنوعات کی قیمتیں کم ہونے کے باوجود مہنگائی کم نہ ہونا انتہائی تشویشناک ہے۔ عوام کو ریلیف دینا حکمرانوں کی ترجیحات میں شامل ہی نہیں، مہنگائی پر قابو پا کر عوام مکاؤ مہم ختم کی جائے وگرنہ عوام حکمرانوں کو ختم کر دیں گے۔

انہوں نے کہا کہ  کرپشن کی دیمک نے ملکی اداروں کو کھوکھلا کر دیا ہے، ہوشربا مہنگائی کا عفریت عوام کو نگلے جا رہا ہے، غریب سے لقمے چھیننے والی پالیسیوں کا تسلسل قوم سے جینے کا حق بھی چھین رہا ہے۔ حکمرانوں کی خود غرضی سرطان کی مانند اس مملکت خداداد کو ختم کرنے کے درپے ہے۔ ملک سیاسی اور مذہبی دہشت گردی کی زد میں ہے، نام نہاد جمہوری حکومت نے اپنے انتخابی وعدوں پر بالکل بھی عمل نہیں کیا، عوام توانائی کے بحران اور مہنگائی کے ہاتھوں اوندھے منہ گر چکے ہیں، لوگ اپنی جان بچانے کی خاطر بھوک، افلاس سے تنگ آ کر ڈاکے، چوری اور لوٹ مار کی طرف مائل ہو رہے ہیں۔ دہشت گردی، بیروزگاری اور مہنگائی پر قابو پانا، امن و امان فراہم کرنا ریاست کی سب سے بڑی ذمہ داری ہے مگر افسوس حکمران اس ذمہ داری کی ادائیگی میں کلیتاً ناکام ہو چکے ہیں۔