حکومتی سرپرستی میں نابینا افراد پر پولیس تشدد کی پرزور مذمت کرتے ہیں۔ سردار منصور خان

پورا پنجاب پولیس سٹیٹ بن چکا ہے، سانحہ ماڈل ٹاؤن نواز شریف اور شہباز شریف کی ایماء پر ہوا

پاکستان عوامی تحریک کے مرکزی ڈپٹی سیکرٹری جنرل سردار منصور خان نے حکومتی سرپرستی میں نابینا افراد پر پولیس تشدد کی پرزور مذمت کرتے ہوئے کہا کہ نابینا افراد پر ریاستی جبر و بربریت پنجاب پولیس کی سفاکانہ کاروائی ہے۔ پنجاب حکومت نے پولیس کو فری ہینڈ دے کر پنجاب کو پولیس سٹیٹ بنا دیا ہے۔ سانحہ ماڈل ٹاؤن کے بعد بینائی سے محروم افراد پر پولیس کے لاٹھی سمیت درجنوں واقعات میں پولیس بربریت کی کئی مثالیں قائم کر چکی ہے۔ پاکستان عوامی تحریک پولیس کے نظام کو یکسر تبدیل کر کے ایک نیا نظام رائج کرے گی۔ انہوں نے کہا کہ سانحہ ماڈل ٹاؤن نواز شریف اور شہباز شریف کی ایما پر ہوا۔ جعلی حکمرانوں میں ذرا سی بھی شرم ہے تو ڈوب مریں۔ معذوروں کے عالمی دن کے موقع پر نابینا افراد پر ظالمانہ لاٹھی چارج ظلم کی انتہا اور انسانیت کی توہین ہے۔ ان خیالات کا اظہار انہوں نے گزشتہ روز میڈیا سیل سے گفتگو کرتے ہوئے کیا۔ اس موقع پر مصطفی خان، غلام علی خان، انصار ملک، فاروق بٹ، عثمان بٹ، ابرار رضا ایڈووکیٹ اور اشتیاق میر ایڈووکیٹ بھی موجود تھے۔

انہوں نے کہا کہ جمہوریت کے دعویدار حکمرانوں کے اس شرمناک عمل سے ثابت ہو گیا ہے کہ صرف قانون ہی نہیں پنجاب کے حکمران اور پولیس والے بھی اندھے ہیں۔ پولیس کے غنڈوں کے اس کارنامے نے واضح کردیا ہے کہ اس ملک میں کرپشن اور دہشت گردی کا راج قائم ہے۔ معذور افراد پر پولیس کی بربریت انسانی تاریخ کے بد ترین واقعات میں سے ایک ہے۔ حکمرانوں کی بے حسی کی انتہا ہے کہ اتنے بڑے سانحے پر بھی چپ سادھے بیٹھے ہیں۔ اب حسب روایت ایک دو پولیس افسران کو قربانی کا بکرا بناتے ہوئے معطل کر دیا جائیگا۔ انہوں نے کہا کہ معذوروں کے عالمی دن کے موقع پر بصارت سے محروم افراد پر جس طرح مظالم ڈھائے گئے ہیں وہ مہذب دنیا کے منہ پر زناٹے دار طمانچہ ہیں۔ ملک میں جنگل کا قانون ہے اور اسے لگام دینے والا کوئی نہیں۔ سیاسی، مذہبی اور سماجی تنظیمیں مصلحتوں اور مفادات سے باہر نکل کر اس ظلم کو روکنے میں مؤثر ترین کردار ادا کریں۔ دنیا کا ہر قانون اور ضابطہ اس روح فرسا واقعہ کی شدید ترین مذمت کرتا ہے۔ افسوس جن کے ذمے ملک و ملت کی جان، مال اور عزت کی ذمہ داری تھی وہ لٹیرے بن چکے ہیں۔