حکمران اس وقت سے ڈریں جب عوام کا ہاتھ اور حکمرانوں کا گریبا ن ہوگا۔ سردار منصور خان

حکومتی وزراء پاک فوج کے ادارے کے خلاف ہرزہ سرائی سے باز رہیں
فوج کے ادارے کو تحفظ دینے کیلئے آرمی چیف اور افواج پاکستان کے جوانوں کے ساتھ ملک کا بچہ بچہ بھی ان کے ساتھ کھڑا ہو گا

پاکستان عوامی تحریک کے مرکزی ڈپٹی سیکرٹری جنرل سردار منصور خان نے کہا ہے کہ موجودہ حکمران اس وقت سے ڈریں جب عوام کا ہاتھ اور حکمرانوں کا گریبان ہوگا۔ حکومتی وزراء پاک فوج کے خلاف ہرزہ سرائی سے باز رہیں۔ پاک فوج کے جوانوں کی ذمہ داری ریاست پاکستان کی حفاظت ہے۔ آرمی کے مورال کو کم کرنے کی ناپاک سازش عالمی سامراج کا ایجنڈا ہے، بعض وزراء اس مذموم اور گھٹیا ملک دشمنی پر مبنی کام پر متعین کئے گئے ہیں اور وہ پاک فوج کے خلاف انتہائی شرمناک اور توہین آمیز کلمات کہے جا رہے ہیں۔ ایسا شرمناک عمل واضح طور پاکستان دشمن ایجنڈا لگتا ہے، یہ صرف فوج نہیں بلکہ ریاست دشمنی ہے۔ اس قدر زہر تو پاکستان کی افواج کے خلاف دشمن ملک کے وزراء نے بھی کبھی نہیں اُگلا۔ وزراء ذاتی حیثیت میں اتنا بڑا اقدام نہیں کر سکتے یہ حکومت کی ڈبل گیم ہے۔

انہوں نے کہا کہ موجودہ حکمرانوں کا ہمیشہ یہ طرز عمل رہا ہے کہ اقتدار میں آ کر خود کو مضبوط کرنے کیلئے پاک فوج اور پاک عوام سے ٹکر لیتے ہیں۔ موجودہ حکمرانوں کو الیکشن جتوانے کے عمل میں بھی طالبان کا بہت بڑا حصہ ہے۔ عدلیہ کے تقدس کو پامال کرنے والے ایک شخص کی سربراہی میں دہشت گرد گروہوں اور غیر آئینی مجرمانہ الیکشن کمیشن نے مل کر موجودہ حکومت کو اقتدار تک پہنچایا ہے۔ دہشت گرد نظریاتی طور پر باہر سے پروان چڑھے ہیں اور انکی فنڈنگ بھی ہوتی رہتی ہے۔

وہ پاکستان عوامی تحریک راولپنڈی، اسلام آباد کے عہدیداران وکارکنان کے اجلاس سے خطاب کر رہے تھے۔ انہوں نے مزید کہا کہ دہشت گرد حکمرانوں کی پرائیویٹ آرمی کے طور پر ملک میں آنے والے وقت میں بہت بڑے خون خرابے کا ساماں پیدا کر رہے ہیں۔ فوج کے ادارے کو تحفظ دینے کیلئے آرمی چیف اور افواج پاکستان کے جوانوں کے ساتھ ملک کا بچہ بچہ بھی ان کے ساتھ کھڑا ہو گا کیونکہ یہ پوری قوم کی ذمہ داری ہے۔