مہنگائی کے حالیہ طوفان کی وجہ سے طلباء کا تعلیم حاصل کرنا مشکل ہو چکا ہے۔ رضوان بشیر

علم کی اہمیت سے بہرہ ور قومیں اپنے ممالک میں بچوں کو مفت تعلیم دے رہی ہیں
یکساں نظام تعلیم اور کم ازکم میٹرک تک مفت تعلیم کانظام لانے کی ضرورت ہے

مصطفوی سٹوڈنٹس موومنٹ کے مرکزی سیکرٹری جنرل رضوان بشیر نے کہاہے کہ مہنگائی کے حالیہ طوفان کی وجہ سے طلباء کا تعلیم حاصل کرنا مشکل ہو چکا ہے۔ پڑھائی اور کتابوں کے ناقابل برداشت اخراجات کی وجہ سے پاکستان میں تعلیم کاحصول عام آدمی کے بچوں کے لئے ناممکن ہوکررہ گیاہے، علم کی اہمیت سے بہرہ ور قومیں اپنے ممالک میں بچوں کو مفت تعلیم دے رہی ہیں لیکن پاکستان میں تعلیم کے حصول کو مشکل بنا دیا گیا ہے۔ وطن عزیز میں اس وقت بھی کروڑ وں نونہال سکول نہیں جاتے ان کے لئے تعلیم کے دروازے بندہونے کی وجہ موجودہ کرپٹ نظام ہے۔ ان خیالات کااظہار انہوں نے مرکزی سیکرٹریٹ ماڈل ٹاؤن میں مصطفوی سٹوڈنٹس موومنٹ اسلام آباد کے عہدیدران کے وفد سے گفتگو کرتے ہوئے کیا۔ وفد میں مصطفوی سٹوڈنٹس موومنٹ اسلام کے صدر سعید خان نیازی، نائب صدر ندیم احمد، محسن رضا اور نعمان احمد بھی شامل تھے۔ اس موقع پرعمار منعم، تجمل حسین اور محمد عماد شیخ بھی موجود تھے۔ رضوان بشیرنے کہاکہ ملک میں نظام تعلیم کو بہتر اور آسان بنانے کے لئے ہنگامی اقدامات کرنے کی ضرورت ہے ایسانظام لایاجائے جس کے تحت غریب اور امیر کافرق نہ رہے، امیر کابچہ جس سکول میں تعلیم حاصل کرے غریب کابچہ بھی اسی سکول میں تعلیم حاصل کرسکے اس کے لئے یکساں نظام تعلیم اور کم ازکم میٹرک تک مفت تعلیم کانظام لانے کی ضرورت ہے۔ انہوں نے تعلیمی اداروں کے اندر تعلیمی کلچرکو پروان چڑھانے کی ضرورت پر زوردیتے ہوئے کہاکہ ہم سب کو مل کر تعلیمی اداروں میں علم دوست ماحول بناناہوگا تاکہ تعلیمی اداروں سکول، یاکالجز یایونیورسٹیز میں طلبا ء طالبات کو علم کی اہمیت کااندازہ ہوسکے اور ان کی تمام ترتوجہ علم کے حصول کی جانب ہو۔ انہوں نے کہاکہ مصطفوی سٹوڈنٹس موومنٹ نے تعلیمی اداروں میں مثبت رویوں کو پروان چڑھانے کے لئے ہمیشہ اپنا کرداداداکیا ہے۔