تھرپارکر میں درجنوں معصوم بچوں کی ہلاکت حکمرانوں کی نااہلی اور آئین پاکستان کی خلاف ورزی ہے۔ مصطفی خان

سپریم کورٹ چیف سیکرٹری کو طلب کرنے کی بجائے وزیراعلیٰ سندھ اور وزیراعظم پاکستان کو طلب کر کے نااہل قراردے

اسلام آباد( )08مارچ 2014ء پاکستان عوامی تحریک کے رہنما انچارج میڈیاسیل مصطفی خان نے کہا ہے کہ تھرپارکر میں بھوک کے باعث درجنوں معصوم بچوں کی ہلاکتیں حکمرانوں کی نااہلی اور آئین پاکستا ن کی خلاف ورزی ہے۔ سپریم کورٹ چیف سیکرٹری کو طلب کرنے کی بجائے وزیراعلیٰ سندھ اور وزیراعظم پاکستان کو طلب کرے۔ عوام کو بنیادی حقوق نہ دینے پر آئین پاکستان کی خلاف ورزی کے مرتکب حکمرانوں کو نااہل قراردیا جائے۔

انہوں نے کہا کہ غریب عوام کو بھوک اور افلاس کاتحفہ دینے والے حکمرانوں کو اقتدار میں رہنے کا کوئی حق حاصل نہیں ہے۔ آئین کے آرٹیکل 38 کے تحت ریاست عوام کوروٹی، کپڑا، مکان، تعلیم اور صحت اوربنیادی سہولتیں دینے کی پابند ہے۔ لیکن حکمران اپنی عیاشیوں میں مگن ہیں اور عوام بھوک اور افلاس کی چکی میں پس رہے ہیں۔ حکمران اپنی کرسی بچانے کی فکر میں غریب عوام سے کئے گئے وعدے بھول کر اقتدار کے نشے میں بد مست ہاتھی بن چکے ہیں۔ آئین کے آرٹیکل 38 کی خلاف ورزی کامرتکب ہونے پر وزیراعلی سندھ اور وزیراعظم پاکستان آرٹیکل 6 کی خلاف ورزی کے مرتکب ہوئے ہیں۔ آئین کی خلاف ورزی کرنے پر عیاش حکمرانوں کو نااہل قراردے کر جیل بھیجا جائے اور ہمیشہ کے لئے سیاست سے آؤٹ کردیاجائے۔

انہوں نے کہا کہ معصوم جانوں کے ضیاع پر پوری قوم کے لئے لمحہ فکریہ ہے۔ انہوں نے کہا کہ ڈاکٹر طاہرالقادری نے قوم کو آئین کاشعور دیا اور بتایا کہ آئین پاکستان عوام کے حقوق کی ضمانت دیتا ہے لیکن حکمران مسلسل آئین پاکستان کی خلاف ورزی کے مرتکب ہو رہے ہیں۔ پاکستان عوامی تحریک عوام کو دعوت فکر دے رہی ہے کہ اٹھو اور ڈاکٹر طاہرالقادری کے انقلاب کاحصہ بن کر ملک میں حقیقی تبدیلی میں اپنا کردار ادا کریں۔