قوم دہشت گردوں کے خلاف آپریشن کا آغاز کرنے پر فوج کو سلام پیش کرتی ہے

امن کی بھیک مانگنے والی حکومت نے نہیں، آپریشن کا فیصلہ افواج پاکستان نے کیا
حکومت کو ریاست، عوام اور افواج پاکستان کے جوانوں سے نہیں صرف اور صرف لوٹ مار سے سروکار ہے
پاکستان عوامی تحریک کے صدر شیخ زاہد فیاض کا عوامی تحریک اسلام آبادکے وفد سے گفتگو

اسلام آباد ( )25فروری 2014ءافواج پاکستان دہشت گردوں کے خلاف آپریشن جاری رکھے۔ پوری قوم فوج کو سلام پیش کرتی ہے جس نے غیرت ملی کا اظہار کرتے ہوئے دہشت گردوں کے خلاف آپریشن کا آغاز کیا۔ دہشت گردوں سے امن کی بھیک مانگنے والی حکومت نے نہیں، آپریشن کا فیصلہ افواج پاکستان نے کیا ہے۔ افسوس حکومت کو ریاست، عوام اور افواج پاکستان کے جوانوں سے نہیں صرف اور صرف لوٹ مار سے سروکار ہے۔ ریاست اورطالبان کے مطالبات کا کسی ایک جگہ سنگم ہو ہی نہیں سکتا۔ طالبان طالبان کے کھیل کی گرد اڑائی جا تی رہی اورقوم کو ذہنی طور پر ایک تماشے میں الجھادیا گیا۔ قوم کی توجہ اہم مسائل سے ہٹائی جا رہی ہے اور پورے ملک کے اثاثے بیچ کر کھائے جا رہے ہیں۔ نجکاری کمیشن کے ذریعے قومی اثاثے بیچ کر خود خریدے جا رہے ہیں۔ ان خیالات کا اظہار پاکستان عوامی تحریک کے مرکزی صدر شیخ زاہد فیاض نے عوامی تحریک اسلام آباد کے وفد سے ملاقات میں گفتگو کرتے ہوئے کیا۔

اس موقع پر سیکرٹری جنر ل سردارمنصورخان، ریاست علی خان، انصار ملک، اشتیاق میر ایڈووکیٹ، بھی موجود تھے۔ شیخ زاہد فیاض نے کہا کہ پہلے مرحلے میں 31اداروں کی نجکاری کی جا رہی ہے افسوس ان میں منافع پر چلنے والے قومی ادارے بھی شامل ہیں۔ آئین کا آرٹیکل 247 وفاقی حکومت کو اختیار دیتا ہے کہ وہ ایگزیکٹو اتھارٹی کو قبائلی علاقہ جات تک نافذ کر سکتی ہے جس میں قرم ایجنسی، نارتھ اور ساؤتھ وزیرستان ایجنسی بھی شامل ہے۔ آئین کے آرٹیکل 256 کے مطابق کسی پرائیویٹ تنظیم کو عسکری تنظیم بنانے کی ہر گز اجازت نہیں اور ایسا عمل غیر قانونی اور غیر آئینی ہو گا۔