مذاکراتی کمیٹیوں کا پورا عمل ایک ڈرامہ ہے اور قوم کی آنکھوں میں دھول جھونکی جا رہی ہے۔ مصطفی خان

پاکستان کی بقا اور سالمیت کیلئے دہشت گردی سب سے بڑا خطرہ ہے

پاکستان عوامی تحریک اسلام آباد کے رہنما انچارج میڈیا سیل مصطفی خان نے کہا ہے کہ پاکستان کی بقا اور سالمیت کیلئے دہشت گردی سب سے بڑا خطرہ ہے۔ دہشت گردی کے ذمہ دار نااہل حکمران اور سیاسی لیڈر ہیں جن میں جرات نہیں کہ وہ دہشت گردوں سے ڈیل کر سکیں۔ مذاکراتی کمیٹیوں کا پورا عمل ایک ڈرامہ ہے اور قوم کی آنکھوں میں دھول جھونکی جا رہی ہے۔ وہ اسلام آباد میڈیا سیل میں پاکستان عوامی تحریک اسلام آباد کے رہنماؤں سے گفتگو کر رہے تھے۔ انہوں نے کہا کہ ان مذاکرات کی کوئی حیثیت نہیں، محض سیاسی تماشہ ہے۔ قوم کو ذہنی طور پر ایک تماشے میں الجھایا جا رہا ہے تا کہ عوام کی توجہ اہم مسائل سے ہٹائی جا سکے۔ مذاکرات کی گرد اتنی اڑا دی گئی کہ سب کچھ اسی میں گم ہو گیا ہے۔ پورے ملک کے اثاثے بیچ کر کھائے جا رہے ہیں۔

انہوں نے کہا کہ دہشت گرد اسلام اور پاکستان کو بدنام کر رہے ہیں۔ حکمران مجرموں کو گرفتار کرنے کیلئے انتہائی سنجیدہ اور موثر اقدامات اٹھائیں تا کہ عوام میں عدم تحفظ کے شدید احساس کا خاتمہ ممکن ہو سکے اور ایسے سفاک عناصر سے آہنی ہاتھوں سے نمٹے۔ پاکستان کو غیر مستحکم کرنے مذہبی اور سیاسی دہشت گردی کے ساتھ ساتھ ملک میں لسانی، علاقائی اور سیاسی بنیادوں پر فسادات کو ہوا دینے کی گھناؤنی سازش کی جارہی ہے۔ اسلام انتہا پسندی، فرقہ واریت اور دہشت گردی کی ہر سطح پر مذمت کرتا ہے اور انسانیت کو امن، برداشت، رواداری، احترام اور بھائی چارے کا درس دیتا ہے۔ ملک کے مختلف حصوں میں بم دھماکوں کے نتیجے میں ہونے والے انسانی جانوں کے ضیاع کی شدید الفاظ میں مذمت کرتے ہیں۔ دہشت گرد انسانیت کے قاتل ہیں اور وطن عزیز کے امن کو سبوتاژ کر کے عدم تحفظ کا شدید احساس پیدا کر کے اپنے مذموم مقاصد کا حصول چاہتے ہیں۔ انہوں نے کہا کہ سیاست دانوں نے ذاتی مفادات کی خاطر پوری قوم کو لقمہ اجل بنا دیا ہے۔ وقت دور نہیں جب ڈاکٹر طاہرالقادری کی قیادت میں انقلاب آئے گا اور غریب کا مقدر بدلے گا۔