ملک کو دہشت گردی اور قتل غارت گری سے فوری نجات دلائی جائے۔ اشتیاق میر ایڈووکیٹ

عوام بدامنی، دہشت گردی، ٹارگٹ کلنگ، غربت اور مہنگائی کی آگ میں جل رہے ہیں

اسلام آباد ( )21جنوری2014ء پاکستان عوامی تحریک فیڈرل ایریا کے صدر اشتیاق میر ایڈووکیٹ نے کہا ہے کہ اس وقت پورے ملک کے عوام بدامنی، دہشت گردی، ٹارگٹ کلنگ، غربت اور مہنگائی کی آگ میں جل رہے ہیں، خودکش حملے، دھماکے روز کا معمول بن چکے ہیں، لیکن حکمران حالات پرقابو پانے میں ناکام ہو چکے ہے۔ ان خیالات کا اظہار انہوں نے گزشتہ روز اسلام آباد میڈیا سیل میں عوامی تحریک کی ممبر سازی مہم کاجائزہ لینے کے لئے منعقدہ اجلاس کے موقع پرگفتگوکرتے ہوئے کیا۔

انہوں نے کہا کہ ملک کے 98 فیصد عوام بھوک، افلاس، جہالت اور عدم تحفظ کا شکار ہیں، لیکن ملک میں روزانہ درجنوں معصوم شہری دہشت گردی، ٹارگٹ کلنگ اور بھتہ خوری کاشکار ہیں شہری اپنے گھروں میں بھی اپنے آپ کوغیر محفوظ سمجھتے، پوراملک خوف و ہراس کی لپیٹ میں ہے۔ اس موقع پر انچارج میڈیاسیل مصطفی خان، میڈیاکوآرڈینیٹر غلام علی خان، قاری منہاس اور مبشر رندھاوا بھی ان کے ہمراہ تھے۔ انہوں نے کہا کہ ملک میں خانہ جنگی کی صورت حال ہے اور حکمران چین کی بانسری بجا رہے ہیں اور اپنے فرائض سے غفلت برت رہے ہیں۔

انہوں نے کہا کہ دہشت گرد اپنے مخصوص مقاصد کے حصول کے لئے مذموم اور گھنائونا کھیل کھیل رہے ہیں۔ کے پی کے میں ڈدرون حملے بند نہیں ہو رہے، حکمرانوں نے قوم کو معاشی، سیاسی اور اقتصادی طور پر مفلوج کردیاہے۔ بجلی کی لوڈشیڈنگ کے ساتھ ساتھ گیس کی بندش بھی عوام کے لئے درد سر بن چکی ہے۔ عوام کو ریلیف دینے کے حکومت کے دعوے دھرے کے دھرے رہ گئے ہیں۔ ایسے حالات میں نااہل حکمرانوں کا برسراقتدار رہنے کا کائی جواز نہیں رہتا۔ انہوں نے مزید کہا کہ ریاست آئین کے آرٹیکل 38 کے تحت ہرشہری کو روٹی، کپڑا، مکان، تعلیم اور صحت اور امن و امان، مال اور جان کی حفاظت کی فراہمی حکومت کی ذمہ دار ہوتی ہے لیکن حکمران مکمل طور پر ناکام ہیں۔