حکومت کی 97 فیصد عوام سے لقمہ چھیننے کی پالیسیاں جاری ہیں۔ خرم نواز گنڈا پور

بجلی کے نرخوں میں اضافے کی روش جاری رکھ کر حکومت نے عوام دشمن پالیسیوں پر مہر تصدیق ثبت کر دی
پاکستان عوامی تحریک اسلام آباد اور راولپنڈی کے عہدیداران سے مرکزی سیکرٹریٹ میں ملاقات میں گفتگو

پاکستان عوامی تحریک کے سیکرٹری جنرل خرم نواز گنڈ اپور نے کہا ہے کہ حکومت کے 7 ماہ کے دور اقتدار میں 97 فیصد عوام سے لقمہ چھیننے کی پالیسیاں جاری ہیں اور غریب سے جینے کا حق بھی چھین لیا گیا ہے۔ بجلی کی قیمتوں میں اضافے کی روش جاری ہے۔ اس بار ایک روپیہ فی یونٹ مذید بڑھانے کی سمری بھی منظور ہوچکی ہے اور ہر مہینے اضافے اور چند پیسوں کی کمی کرنے کا ڈرامہ رچایا جاتا ہے جسے عوام مسترد کرتے ہیں۔ حکومت فوری طور بجلی کے نرخوں میں اضافہ واپس لے اور بجائے اضافے کے قیمتوں میں کمی کا اعلان کرے۔

وہ پاکستان عوامی تحریک اسلام آباد کے عہدیداران سے مرکزی سیکرٹریٹ میں ملاقات میں گفتگو کر رہے تھے۔ اس موقع پر صدر پاکستان عوامی تحریک اسلام آباد فیڈرل ایریا اشتیاق میر ایڈووکیٹ، انصار ملک، شاہد شنواری، گفتار حسین شاہ اور دیگر بھی موجود تھے۔ انہوں نے کہا کہ نوجوانوں کو روزگار کا منشور دے کر غریبوں کے نام پر اقتدار حاصل کرنے والی جماعت کے دور میں غریبوں کا ہی استحصال ہو رہا ہے۔ بجلی کے نرخوں میں اضافے کی روش جاری رکھ کر حکومت نے عوام دشمنی کی پالیسیوں پر مہر تصدیق ثبت کر دی ہے۔ انہوں نے کہا کہ حکومت کے پاس عوام کو ریلیف دینے کا کوئی پروگرام نہیں ہے جو مایوس کن امر ہے۔ محرومی اور مایوسی سے نجات کیلئے عوام کو اس فرسودہ نظام کے خلاف میدان عمل میں نکلنا ہو گا۔ انہوں نے کہا کہ عوام کش پالیسیوں کا تسلسل مقتدر طبقے کی غلامانہ سوچ کی عکاسی کرتاہے۔