29 دسمبر کو عوام کا ٹھاٹھیں مارتا سمندرکر پٹ نظام انتخاب، مہنگائی اور کرپشن کے خلاف لاہور میں موجزن ہو گا۔ سردار منصور خان

29 دسمبر کینسر زدہ نظام کی سرجری کے آغاز کا دن ہو گا۔ عمر ریاض عباسی

اسلام آباد ( ) 27 دسمبر 2013ء پاکستان عوامی تحریک ڈپٹی سیکرٹری جنرل سردار منصور خان نے کہا ہے کہ ڈاکٹر محمد طاہر القادری 29 دسمبر کو ہونے والی احتجاجی ریلی میں لاکھوں افراد کے سامنے حقیقی تبدیلی کا لائحہ عمل رکھیں گے۔ دسمبر کا آخری عشرہ پاکستان کی تکمیل کی طرف اہم قدم ہو گا۔ ان خیالات کااظہار انہوں نے گزشتہ روز عوامی تحریک اسلام آباد اور راولپنڈی عہدیدارن سے گفتگو کرتے ہوئے کیا۔

انہوں نے کہا کہ عوام کا ٹھاٹھیں مارتا سمندر ملک میں روایتی سیاست، کر پٹ نظام انتخاب، مہنگائی اور کرپشن کے خلاف لاہور میں موجزن ہو گا پاکستان ایک نظریاتی ملک ہے مگر 66 سال سے اسلاف کے نظریات اور اسلامی اقدار دونوں کا وجود وقت کے ساتھ تنزلی کا شکار رہا اور اب نوبت یہاں تک پہنچ گئی ہے کہ ریاست پاکستان کو سنگین خطرات نے گھیر رکھا ہے۔ اس موقع پر عوامی تحریک، تحریک منہاج القرآن کے عہدیداران و کارکنان بھی موجود تھے۔

اس موقع پر خطاب کرتے ہوئے پاکستان عوامی تحریک کے ڈ پٹی سیکرٹری اطلاعات عمرریاض عباسی نے کہا کہ موجودہ انتخابی نظام کی قباحتوں نے عوام کو حقیقی جمہوریت سے کوسوں دور کر دیا ہے۔ الیکشن کی رسم کو جمہوریت کہنے والا دو فی صد طبقہ عوام کے حقوق پر شب خون مارنا وراثتی حق سمجھتا ہے۔ اب وقت آ گیا ہے کہ اس بد تر ین نظام کے بازو کاٹ کر اپنے آپ کو آزاد کروایا جائے۔

انہوں نے کہا کہ ڈاکٹر طاہر القادری کی جدوجہد ملک کو حقیقی جمہوریت سے ہمکنار کرنے سے عبارت ہے اور عوام کے چہرے پر خوشحالی اور سکون کی رونق اس وقت تک واپس نہیں آ سکتی جب تک موجودہ نظام انتخاب سے غیر جمہوری اجزاء کا خاتمہ نہیں کر دیا جاتا۔ 29 دسمبر کینسر زدہ نظام کی سرجری کے آغاز کا دن ہو گا۔ ریاست کے استحکام کے ساتھ ہی 19 کروڑ عوام کی خوشیاں وابستہ ہیں۔ عوام کو ڈاکٹر طاہر القادری کے ایجنڈے کے ساتھ اتفاق کر کے حقیقی جمہوریت کیلئے وہی کردار ادا کرنا ہو گا جو تحریک پاکستان کے وقت کیا تھا۔ مسلمانان ہند نے انگریز کی غلامی سے نجات حاصل کی تھی، آج موجودہ ظالمانہ نظام انتخاب کی غلامی سے نجات کا مسئلہ درپیش ہے۔